தூத்துக்குடியில் பிப்.11ல் தமுஎகச சார்பில் மாநில அளவிலான கலை, இலக்கிய விருதுகள் வழங்கும் விழா!!

தமிழ்நாடு முற்போக்கு எழுத்தாளர் கலைஞர்கள் சங்கத்தின் சார்பில் மாநில அளவிலான கலை, இலக்கிய விருதுகள் வழங்கும் விழா பிப்ரவரி 11 ஆம் தேதி தூத்துக்குடியில் தமிழ்நாடு அரசு ஊழியர் சங்க வளாகத்தில் வைத்து நடைபெறுகிறது. 

இவ்விழாவில் முற்போக்கு கலை இலக்கியத்திற்கு வாழ்நாள் பங்களிப்பு செய்த ஆளுமைக்கான சின்ன பாரதி அறக்கட்டளை விருது ரூ.1 லட்சம் பேராசிரியர் மார்க்ஸ் அவர்களுக்கு வழங்கப்படுகிறது, அதேபோல் சிறந்த தொண்மைசார் நூல், சிறந்த நாவல், சிறந்த விளிம்பு நிலை மக்கள் குறித்த படைப்பு, சிறந்த கலை இலக்கிய விமர்சன நூல், சிறந்த கவிதை தொகுப்பு, சிறந்த சிறுகதை தொகுப்பு, சிறந்த மொழிபெயர்ப்பு, சிறந்த மொழி வளர்ச்சிக்கு உதவும் நூல், சிறந்த குழந்தைகள் இலக்கிய நூல், சிறந்த ஆவணப்படம், சிறந்த நாட்டுப்புற கலைச்சுடர், சிறந்த குறும்படம், சிறந்த இசை சுடர், சிறந்த நாடகச்சுடர், சிறந்த பெண் படைப்பாளுமை ஆகிய‌ 16 விருதுகள் வழங்கப்பட உள்ளன. அதனை தொடர்ந்து அன்றைய தினம் கலை மாலை நடைபெறுகிறது.

இந்நிலையில் இன்று தமிழ்நாடு அரசு ஊழியர் சங்கத்தில் வைத்து வரவேற்பு குழு கூட்டம் தமிழ்நாடு முற்போக்கு எழுத்தாளர் கலைஞர்கள் சங்க மாவட்ட தலைவர் கு.ராமசுப்பு தலைமையில் நடைபெற்றது. இதில் தமுஎகச மாவட்ட செயலாளர் பே.சங்கரலிங்கம் வரவேற்புரையாற்றினார். இதில் தமுஎகச மாநில தலைவர் மதுக்கூர் ராமலிங்கம், மாநில துணைப் பொது செயலாளர் வெண்புறா, மாநில செயற்குழு உறுப்பினர் லட்சுமி காந்தன், மாநிலக்குழு உறுப்பினர் உதய சங்கர் உள்ளிட்ட நிர்வாகிகள் கலந்து கொண்டனர்.

தூத்துக்குடியில் நடைபெறும் கலை, இலக்கிய விருது வழங்கும் விழாவிற்கு வரவேற்புக்குழு தலைவராக வ.உ.சி கல்லூரியின் முதல்வர் டாக்டர் சொ.வீரபாகு அவர்களும், துணைத் தலைவராக தமிழ்நாடு அரசு ஊழியர் சங்க மாநில துணைப் பொதுச் செயலாளர் என்.வெங்கடேசன் அவர்களும், வரவேற்புக்குழு செயலாளராக ஓவியர் ம.சுப்பிரமணியன், துணைச் செயலாளராக தீக்கதிர் இரா.விக்னேஷ்வரன், பொருளாளராக மருத்துவர் பி.சிவனாகரன் உள்ளிட்ட 30 பேர் கொண்ட வரவேற்புக்குழு தேர்வு செய்யப்பட்டது.

முன்னதாக தமிழ்நாடு முற்போக்கு எழுத்தாளர்கள் கலைஞர்கள் சங்க மாநில தலைவர் மதுக்கூர் ராமலிங்கம் செய்தியாளர்களிடம் கூறுகையில்

தூத்துக்குடியில் வரும் பிப்ரவரி 11ஆம் தேதி தமிழ்நாடு முற்போக்கு எழுத்தாளர்கள் மற்றும் கலைஞர்கள் சங்கம் சார்பில் மாநில அளவில் இலக்கியம், நாவல், கவிதை, குறும்படம், உள்ளிட்ட பல்வேறு பிரிவுகளில் சிறப்பாக பணிபுரிந்த ஆளுமைகளுக்கு என 16 விருதுகள் வழங்கப்பட உள்ளது இலக்கியத்தில் வாழ்நாள் சாதனை  விருதாக சின்ன பாரதி அறக்கட்டளை சார்பில் விருது மற்றும் ரூபாய் ஒரு லட்சம் ரொக்க பணம் பேராசிரியர் மார்க்ஸ் அவர்களுக்கு வழங்கப்படுகிறது.

மேலும்  சாகித்ய அகடமி விருது பெற்றுள்ள எழுத்தாளர் நல்லதம்பி அவர்களுக்கு சிறந்த மொழி பெயர்ப்பாளருக்கான விருது வழங்கப்படுகிறது, 

அதேபோல் பிரதமர் மோடி குறித்து பிபிசி வெளியிட்ட ஆவண படத்தை மத்திய அரசு தடை செய்துள்ளது,  ஆனால் அந்த ஆவணப்படம் உலகம் முழுவதும் வெளியாகி விட்டது ஆவணம் படத்தை ஆதாரப்பூர்வமாக மறுக்க வேண்டுமே தவிர அதை தடை செய்வதன் மூலம் மறைத்து விட முடியாது என அவர் தெரிவித்தார்.