ஆறுமுகநேரியில் காதலிக்க மறுத்த இளம்பெண்ணுக்கு தாக்குதல்: தாய்–மகளுக்கு கொலை மிரட்டல்; வாலிபர் கைது

தூத்துக்குடி மாவட்டம் ஆறுமுகநேரியில், காதலிக்க மறுத்த இளம்பெண்ணின் வீட்டிற்குள் அத்துமீறி நுழைந்து, அவரையும் அவரது தாயாரையும் தாக்கி கொலை மிரட்டல் விடுத்ததாக கூறப்படும் வாலிபரை போலீசார் கைது செய்தனர்.

ஆறுமுகநேரி செல்வராஜபுரம் பகுதியைச் சேர்ந்த இசக்கிமுத்து மகன் இசக்கி ராஜேஷ் (25). கூலித் தொழிலாளியான இவர், அதே பகுதியைச் சேர்ந்த 21 வயது இளம்பெண்ணை காதலித்து வந்ததாக கூறப்படுகிறது.

ஆனால், அந்த இளம்பெண் இசக்கி ராஜேஷிடம் பேசுவதைத் தவிர்த்து வந்ததாக தெரிகிறது. இதனால் ஆத்திரமடைந்த இசக்கி ராஜேஷ், சம்பவத்தன்று இளம்பெண்ணின் வீட்டிற்குள் அத்துமீறி நுழைந்து தகராறில் ஈடுபட்டதாக கூறப்படுகிறது.

அப்போது, இளம்பெண்ணை தாக்கி கீழே தள்ளியதுடன், “என்னை ஏன் காதலிக்க மறுக்கிறாய்?” எனக் கேட்டு தகராறில் ஈடுபட்டதாக தெரிகிறது. இதனைத் தடுக்க முயன்ற இளம்பெண்ணின் தாயாரையும் அவர் தாக்கியதாக கூறப்படுகிறது.

மேலும், தன்னை திருமணம் செய்து கொள்ளாவிட்டால் தாய் மற்றும் மகள் இருவரையும் கொலை செய்து விடுவதாக மிரட்டல் விடுத்ததாகவும் புகாரில் தெரிவிக்கப்பட்டுள்ளது.

இதுகுறித்து இளம்பெண் தரப்பில் ஆறுமுகநேரி காவல் நிலையத்தில் புகார் அளிக்கப்பட்டது. புகாரின் அடிப்படையில், காவல் நிலைய சிறப்பு உதவி ஆய்வாளர் கோயில்பிள்ளை வழக்குப்பதிவு செய்து விசாரணை மேற்கொண்டார்.

இதையடுத்து, இளம்பெண் மற்றும் அவரது தாயாரை தாக்கி, கொலை மிரட்டல் விடுத்ததாக கூறப்படும் இசக்கி ராஜேஷை போலீசார் கைது செய்தனர்.

சம்பவம் தொடர்பாக போலீசார் தொடர்ந்து விசாரணை மேற்கொண்டு வருகின்றனர்.