தூத்துக்குடியில் 57,259 மாணவர்களுக்கு இனி காலை உணவு! 1,378 பள்ளிகளில் காமராஜர் காலை உணவு திட்டம் விரிவாக்கம்: அமைச்சர் ஸ்ரீநாத் துவங்கி வைத்தார்!

தூத்துக்குடி: தமிழ்நாடு முழுவதும் பெருந்தலைவர் காமராஜர் காலை உணவுத் திட்டம் விரிவாக்கம் செய்யப்பட்டதைத் தொடர்ந்து, தூத்துக்குடி மாவட்டத்திலும் விரிவாக்கப்பட்ட திட்டப் பணிகள் தொடங்கப்பட்டன. இதன் மூலம் மாவட்டத்தில் மொத்தம் 1,378 பள்ளிகளில் 57,259 மாணவ, மாணவிகள் பயன்பெற உள்ளனர்.

தமிழ்நாடு முதலமைச்சர் அவர்கள் சென்னையில் இன்று பெருந்தலைவர் காமராஜர் காலை உணவுத் திட்டத்தின் விரிவாக்கப் பணிகளை தொடங்கி வைத்தார். இதனைத் தொடர்ந்து தூத்துக்குடி சாமுவேல்புரம் மாநகராட்சி அரசு மேல்நிலைப்பள்ளியில் நடைபெற்ற நிகழ்ச்சியில், மீன்வளம் மற்றும் மீனவர் நலத்துறை அமைச்சர் திரு. ஆ. ஸ்ரீநாத் மற்றும் மாவட்ட ஆட்சியர் திரு. விஷூ மகாஜன், இ.ஆ.ப., ஆகியோர் கலந்து கொண்டனர்.

நிகழ்ச்சியில் மாணவர்களுக்கு காலை உணவை அமைச்சர் மற்றும் மாவட்ட ஆட்சியர் ஆகியோர் நேரடியாக பரிமாறினர். பின்னர் மாணவர்களுடன் அமர்ந்து உணவருந்தினர்.

57,259 மாணவர்கள் பயன்பெற உள்ளனர்

தூத்துக்குடி மாவட்டத்தில் ஊரக மற்றும் பேரூராட்சிப் பகுதிகளில் 1,223 பள்ளிகளில் 35,283 மாணவர்களும், மாநகராட்சி பகுதிகளில் 100 பள்ளிகளில் 14,404 மாணவர்களும், நகராட்சிப் பகுதிகளில் 55 பள்ளிகளில் 7,572 மாணவர்களும் என மொத்தம் 1,378 பள்ளிகளைச் சேர்ந்த 57,259 மாணவ, மாணவிகள் இத்திட்டத்தின் மூலம் பயன்பெற உள்ளனர்.

பள்ளி மாணவர்களின் ஊட்டச்சத்து நிலையை மேம்படுத்தவும், பசியின்றி பள்ளிக்கு வருவதற்கும், கல்வியில் கவனம் செலுத்துவதற்கும் காலை உணவுத் திட்டம் செயல்படுத்தப்பட்டு வருகிறது. தற்போது 6 முதல் 8ஆம் வகுப்பு மாணவர்களையும் உள்ளடக்கும் வகையில் இத்திட்டம் விரிவாக்கம் செய்யப்பட்டுள்ளதாக மாநில அளவில் அறிவிக்கப்பட்டுள்ளது.

தூத்துக்குடி மாவட்டத்தில் விரிவாக்கப்பட்ட காலை உணவுத் திட்டம் தொடங்கப்பட்ட நிகழ்ச்சியில் அமைச்சர், மாவட்ட ஆட்சியர் ஆகியோர் மாணவர்களுடன் உணவருந்திய சம்பவம் கவனம் பெற்றுள்ளது.

தூத்துக்குடி மாவட்டத்தில் மட்டும் 57,259 மாணவர்கள் பயன்பெறும் வகையில் திட்டம் விரிவுபடுத்தப்பட்டுள்ளதால், மாணவர்கள் மற்றும் பெற்றோர்கள் மத்தியில் இது முக்கியத்துவம் பெற்றுள்ளது.