தூத்துக்குடியில் வெள்ள பாதிப்பை தடுக்க ரூ.53.70 கோடியில் பக்கிள் ஓடை விரிவாக்கப் பணி!

மழைக்காலத்திற்கு முன்பாக பணிகளை துரிதப்படுத்த மாநகராட்சி நடவடிக்கை

தூத்துக்குடி மாநகரப் பகுதியில் வடகிழக்கு பருவமழை காலங்களில் பெய்யும் தொடர் கனமழையால் ஏற்படும் மழை வெள்ளநீர், மாநகரின் மையப்பகுதியில் அமைந்துள்ள பக்கிள் ஓடை வழியாக கடலுக்கு சென்று வருகிறது.

கடந்த 2015 மற்றும் 2023ஆம் ஆண்டுகளில் பெய்த தொடர் கனமழையின் போது, மாநகரப் பகுதிகளில் இருந்து அதிகளவில் மழைநீர் பக்கிள் ஓடைக்கு வந்தது. ஆனால், பக்கிள் ஓடையின் அகலம் குறைவாக இருந்ததால், அதிகளவு மழைநீரை உடனடியாக கடலுக்கு கொண்டு செல்ல முடியாத நிலை ஏற்பட்டது.

இதன் காரணமாக மழை வெள்ளநீர் குடியிருப்பு பகுதிகளுக்குள் புகுந்து, பொதுமக்களின் இயல்பு வாழ்க்கை பெரிதும் பாதிக்கப்பட்டது.

5 மீட்டர் அகலப்படுத்தும் பணி

இதுபோன்ற வெள்ள பாதிப்புகளை எதிர்காலத்தில் தவிர்க்கும் வகையில், மழை வெள்ளநீர் பக்கிள் ஓடை வழியாக தடையின்றி கடலுக்கு செல்லும் வகையில், ஓடையின் அகலத்தை கூடுதலாக 5 மீட்டர் அளவிற்கு விரிவுபடுத்தி மேம்படுத்தும் பணி நடைபெற்று வருகிறது.

எப்.சி.ஐ. குடோன் முதல் திரேஸ்புரம் கடற்கரை வரை பக்கிள் ஓடையை அகலப்படுத்தி மேம்படுத்தும் இப்பணிக்கு ரூ.5,370 லட்சம் (ரூ.53.70 கோடி) மதிப்பீடு செய்யப்பட்டுள்ளது.

மழைக்காலத்திற்கு முன்பாக பணிகள் தீவிரம்

வரும் மழைக்காலத்திற்கு முன்னதாக பணிகளில் போதிய முன்னேற்றம் ஏற்படும் வகையில், பக்கிள் ஓடை விரிவாக்கப் பணிகள் தற்போது துரிதமாக மேற்கொள்ளப்பட்டு வருவதாக தூத்துக்குடி மாநகராட்சி நிர்வாகம் தெரிவித்துள்ளது.

இதுகுறித்து மாநகராட்சி ஆணையர் திருமதி சி. பிரியங்கா, இ.ஆ.ப., அவர்கள், மழைக்காலத்திற்கு முன்னதாக பணிகளில் குறிப்பிடத்தக்க முன்னேற்றம் காணும் வகையில் பணிகள் விரைவுபடுத்தப்பட்டு வருவதாக தெரிவித்துள்ளார்.

மழை வெள்ள பாதிப்பைத் தடுக்க ரூ.53.70 கோடி திட்டம் – தூத்துக்குடி மாநகரின் முக்கிய வடிகாலான பக்கிள் ஓடைக்கு புதிய மாற்றம்!