விளாத்திகுளம் அருகே பெண்ணுக்கு பாலியல் தொல்லை கொடுத்தாக புகார்: உதவி ஆய்வாளர் ஆயுதப்படைக்கு மாற்றம்!
பெண்ணுக்கு பாலியல் தொல்லை கொடுத்தாக புகார்: உதவி ஆய்வாளர் ஆயுதப்படைக்கு மாற்றம்!
விளாத்திகுளத்தில் புகார் அளிக்க வந்த பெண்ணுக்கு பாலியல் தொல்லை கொடுத்தாக புகாரில் சிக்கிய உதவி ஆய்வாளர் ஆயுதப்படைக்கு மாற்றம் செய்யப்பட்டுள்ளார்.
தூத்துக்குடி மாவட்டம், விளாத்திகுளம் காவல் நிலையத்தில் உதவி ஆய்வாளராக பணிபுரிந்து வந்த சுதாகர் என்பவர், காவல் நிலையத்திற்கு புகார் அளிக்க வந்த திருமணமான பெண் ஒருவரின் செல்போன் எண்ணுக்கு ஆபாசமாக பேசி பாலியல் தொல்லை கொடுத்தாராம். இதையடுத்து அந்த பெண்ணின் கணவர் தட்டிக் கேட்டபோது உன்னை கைது செய்து உள்ளே வைத்து விடுவேன் என மிரட்டினாராம்.
இதுகுறித்து பாதிக்கப்பட்ட பெண் தூத்துக்குடி மாவட்ட காவல் கண்காணிப்பாளரிடம் புகார் அளித்துள்ளனர். அதனைத்தொடர்ந்து, தூத்துக்குடி மாவட்ட காவல் கண்காணிப்பாளர் பாலாஜி சரவணன், உடனடியாக உதவி ஆய்வாளர் சுதாகரை ஆயுதப்படைக்கு மாற்றம் செய்து உத்தரவிட்டார். கடந்த இரு தினங்களுக்கு முன்புதான் மாவட்ட காவல் கண்காணிப்பாளரிடம் பாராட்டு சான்றிதழ் வழங்கப்பட்ட நிலையில், தற்போது ஒழுங்கு நடவடிக்கை காரணமாக ஆயுதப்படைக்கு மாற்றம் செய்யப்பட்டுள்ளார் என்பது குறிப்பிடத்தக்கது.
