தூத்துக்குடி முதன்மை கல்வி அலுவலரின் நியமன ஒப்புதலுக்கு உயர்நீதிமன்றம் இடைக்கால தடை! அரசுக்கு நிதி இழப்பு ஏற்படுத்தியதாக புகார் – அதிகாரிகளுக்கு நீதிமன்றம் கிடுக்கிப்பிடி!

தூத்துக்குடி முதன்மை கல்வி அலுவலரின் நியமன ஒப்புதலுக்கு உயர்நீதிமன்றம் இடைக்கால தடை! அரசுக்கு நிதி இழப்பு ஏற்படுத்தியதாக புகார் – அதிகாரிகளுக்கு நீதிமன்றம் கிடுக்கிப்பிடி!

தூத்துக்குடி: குலசேகரப்பட்டினம் வள்ளியம்மையார் பெண்கள் உயர்நிலைப் பள்ளியில் இரண்டு அலுவலகப் பணியாளர்களுக்கு வழங்கப்பட்ட பணி நியமன ஒப்புதலுக்கு சென்னை உயர்நீதிமன்ற மதுரை கிளை இடைக்காலத் தடை விதித்துள்ளது. மேலும், இதுபோன்ற வேறு எந்த நியமனங்களுக்கும் ஒப்புதல் வழங்கக்கூடாது என உத்தரவிட்டுள்ள நீதிமன்றம், முதன்மை கல்வி அலுவலர் மீது கூறப்பட்ட புகார் தொடர்பாக பள்ளிக்கல்வித்துறை இயக்குநர் விளக்கம் அளிக்கவும் உத்தரவிட்டுள்ளது.

250 மாணவர்களுக்கு ஒரு பணியிடம் – 100-க்கும் குறைவான மாணவிகள்!

தூத்துக்குடி மாவட்டம் குலசேகரப்பட்டினத்தில் 9 மற்றும் 10-ம் வகுப்புகளுக்கு மட்டும் அரசு நிதியுதவி பெற்று வள்ளியம்மையார் பெண்கள் உயர்நிலைப் பள்ளி செயல்பட்டு வருகிறது. இப்பள்ளியில் கடந்த 15 ஆண்டுகளுக்கும் மேலாக 100-க்கும் குறைவான மாணவிகளே கல்வி பயின்று வருவதாகக் கூறப்படுகிறது.

இந்நிலையில், 2018-ம் ஆண்டு பள்ளிக்கல்வித்துறை வெளியிட்ட அரசாணை எண் 238-ன்படி, ஆசிரியர் அல்லாத பணியிடங்களை நிரப்புவதற்கு மாணவர் எண்ணிக்கை உள்ளிட்ட நெறிமுறைகள் வகுக்கப்பட்டன. அதன்படி 250 மாணவர்கள் இருந்தால் மட்டுமே ஒரு பணியிடத்தை நிரப்ப முடியும் என மனுவில் சுட்டிக்காட்டப்பட்டுள்ளது.

ஆர்டிஐ மூலம் வெளியான தகவல்!

இந்தப் பள்ளியில் 2019-ம் ஆண்டு புலம்பெயர்தல் அடிப்படையில் சாந்தி என்பவர் ஆவண எழுத்தராகவும், வில்வஜோதி என்பவர் அலுவலக உதவியாளராகவும் நியமிக்கப்பட்டனர்.

இதற்கிடையே, 2020-ம் ஆண்டு மாவட்ட கல்வி அலுவலராகப் பணியாற்றிய லட்சுமணசாமி, தகவல் அறியும் உரிமைச் சட்டத்தின் கீழ் அளித்த பதிலில், பள்ளியில் 63 மாணவிகளே பயின்று வருவதால் எந்தவொரு ஆசிரியர் அல்லாத பணியிடத்தையும் நிரப்புவதற்கு முகாந்திரம் இல்லை எனத் தெரிவித்ததாகக் கூறப்படுகிறது.

இதன் காரணமாக, சம்பந்தப்பட்ட நியமனங்களுக்கு நீண்டகாலமாக ஒப்புதல் வழங்கப்படவில்லை. இருப்பினும், இடையில் பணியாற்றிய முதன்மை கல்வி அலுவலர் கணேசமூர்த்தி, அனுமதிக்கப்பட்ட பணியிடங்கள் தொடர்பான பணியாளர் நிர்ணய ஆணையை வழங்கியதாக மனுவில் தெரிவிக்கப்பட்டுள்ளது.

உபரி பணியிடங்களாக அறிவித்த முந்தைய முதன்மை கல்வி அலுவலர்!

அரசாணை மீறப்பட்டதாக சமூக ஆர்வலர்கள் அளித்த புகார்கள் மற்றும் ஊடகங்களில் வெளியான செய்திகளின் அடிப்படையில், 2025-ம் ஆண்டு முதன்மை கல்வி அலுவலராகப் பணியாற்றிய சிதம்பரநாதன், சம்பந்தப்பட்ட பணியிடங்களை ஆய்வு செய்து அரசாணையின்படி உபரி பணியிடங்களாக அறிவித்து உத்தரவிட்டதாக மனுதாரர் தரப்பில் தெரிவிக்கப்பட்டுள்ளது.

ஆனால், அந்த உத்தரவை ரத்து செய்த தற்போதைய முதன்மை கல்வி அலுவலர் சங்கீதா சிந்துராணி, மாவட்ட கல்வி அலுவலர் முனியசாமியின் பரிந்துரையின் அடிப்படையில் திருத்திய பணியாளர் நிர்ணய ஆணையைப் பிறப்பித்ததாகக் கூறப்படுகிறது.

குறிப்பாக, 2025-2026 கல்வியாண்டு முடிவடைய ஏழு நாட்களே இருந்த நிலையில் இந்த உத்தரவு பிறப்பிக்கப்பட்டதாகவும், அதனைத் தொடர்ந்து மூன்று நாட்களுக்குள் சாந்தி, வில்வஜோதி ஆகியோரின் நியமனங்களுக்கு ஒப்புதல் வழங்கப்பட்டதாகவும் மனுவில் குற்றம்சாட்டப்பட்டுள்ளது.

உயர்நீதிமன்ற மதுரை கிளையில் பொதுநல வழக்கு!

அரசாணை எண் 238-ஐ மீறி அரசுக்கு நிதி இழப்பு ஏற்படும் வகையில் பணி நியமன ஒப்புதல் வழங்கப்பட்டுள்ளதாகக் கூறி, வழக்கறிஞர் பாஸ்கரன் பள்ளிக்கல்வித்துறை செயலர், பள்ளிக்கல்வித்துறை இயக்குநர் உள்ளிட்ட அதிகாரிகளுக்கு புகார் மனு அனுப்பியுள்ளார்.

தொடர்ந்து, அரசுக்கு ஏற்படும் நிதி இழப்பைத் தடுத்து நிறுத்தவும், சம்பந்தப்பட்ட நியமன ஒப்புதலுக்கு தடை விதிக்கவும் கோரி சென்னை உயர்நீதிமன்ற மதுரை கிளையில் பொதுநல வழக்கு தொடர்ந்தார். மனுதாரர் தரப்பில் மூத்த வழக்கறிஞர் வி.எச். சண்முகநாதன் ஆஜரானார்.

நியமன ஒப்புதலுக்கு இடைக்காலத் தடை – அதிகாரிகளுக்கு உத்தரவு!

இந்த வழக்கு நீதிபதிகள் பி. வேல்முருகன், கே.கே. ராமகிருஷ்ணன் ஆகியோர் அடங்கிய இரு நீதிபதிகள் அமர்வில் விசாரணைக்கு வந்தது.

வழக்கை விசாரித்த நீதிபதிகள், வள்ளியம்மையார் பெண்கள் உயர்நிலைப் பள்ளிக்கு தூத்துக்குடி மாவட்ட முதன்மை கல்வி அலுவலர் வழங்கிய இரண்டு பணியாளர்களின் நியமன ஒப்புதலுக்கும் இடைக்காலத் தடை விதித்தனர்.

மேலும், வேறு எந்த நியமனங்களுக்கும் ஒப்புதல் வழங்கக்கூடாது என உத்தரவிட்ட நீதிபதிகள், எதிர்மனுதாரர்கள் பதிலளிக்கவும், முதன்மை கல்வி அலுவலர் மீது கூறப்பட்டுள்ள புகார்கள் தொடர்பாக பள்ளிக்கல்வித்துறை இயக்குநர் விளக்கம் அளிக்கவும் உத்தரவிட்டனர்.

இதையடுத்து, வழக்கின் அடுத்தகட்ட விசாரணையை நவம்பர் 30-ம் தேதிக்கு ஒத்திவைத்து நீதிபதிகள் உத்தரவிட்டனர்.

அரசாணையை மீறி அரசு நிதிக்கு இழப்பு ஏற்பட்டதா? அதிகாரிகளின் விளக்கம் என்ன?

மாணவர் எண்ணிக்கைக்கும் பணியாளர் நியமனத்திற்கும் இடையிலான விதிமுறைகள் முறையாகப் பின்பற்றப்பட்டனவா, ஏற்கெனவே உபரி என அறிவிக்கப்பட்ட பணியிடங்களுக்கு மீண்டும் ஒப்புதல் வழங்கப்பட்டதன் பின்னணி என்ன, இதனால் அரசுக்கு நிதிச்சுமை ஏற்பட்டுள்ளதா என்ற கேள்விகள் தற்போது எழுந்துள்ளன. இந்த விவகாரத்தில் பள்ளிக்கல்வித்துறை இயக்குநரின் விளக்கமும், நீதிமன்றத்தின் அடுத்தகட்ட நடவடிக்கையும் முக்கியத்துவம் பெற்றுள்ளன.