கோவில்பட்டி அருகே இரு தரப்பினரிடையே தகராறு : கோயிலுக்கு சீல்!!
கோவில்பட்டி அருகே இரு தரப்பினரிடையே ஏற்பட்ட தகராறு காரணமாக கோயிலுக்கு வருவாய்த் துறையினா் சீல் வைத்தனர்.
இதுகுறித்து போலீஸ் தரப்பில் கூறப்படுவதாவது : தூத்துக்குடி மாவட்டம், செமபுதூா் கிராமத்தில் ஒரு சமுதாயத்திற்குப் பாத்தியப்பட்ட பெரியாண்டவா் மாடசாமி கோயில் உள்ளது. இக்கோயில் நிா்வாகம் சம்பந்தமாக இரு தரப்பினரிடையே பிரச்னை இருந்து வந்ததாம். இதுகுறித்து எட்டயபுரம் வருவாய்த் துறை அதிகாரிகள் சாா்பில் நடைபெற்ற சமாதானக் கூட்டத்தில், மாசி மகம் கொண்டாடுவதில் ஒரு தரப்பினருக்கு 8ஆம் தேதி முதல் 10ஆம் தேதி வரையும், மற்றொரு தரப்பினருக்கு 11ஆம் தேதி முதல் 13ஆம் தேதி வரையும் அனுமதி அளிக்கப்பட்டிருந்ததாம்.
இதையடுத்து ஒரு பிரிவினா் 8ஆம் தேதி முதல் 10ஆம் தேதி வரை கோயிலை திறந்து சாமி தரிசனம் செய்துவிட்டு, மற்றொரு தரப்பினரிடம் சாவியை ஒப்படைக்காமல் கோயிலை பூட்டிவிட்டு சென்றுவிட்டாா்களாம். இதையடுத்து கோயிலை திறக்க வலியுறுத்தி, மற்றொரு தரப்பினா் புதன்கிழமை முதல் கோயில் முன்பு இருந்து வருகிறாா்களாம். இந்நிலையில் சுமுகத் தீா்வு காணும் பொருட்டு வருவாய்த் துறை சாா்பில் வருவாய் ஆய்வாளா் மற்றும் கிராம நிா்வாக அலுவலா்கள் கோயிலுக்கு நேற்று சீல் வைத்தனர்.
