ஏற்றுமதி நிறுவன குடோனில் ரூ.3லட்சம் முந்திரி பருப்பு கொள்ளை : 5பேர் கைது!

தூத்துக்குடியில் ஏற்றுமதி நிறுவன குடோனில் வாட்ச்மேனை கத்தியை காட்டி மிரட்டி ரூ.3.20 லட்சம் மதிப்புள்ள முந்திரிபருப்பு மூட்டைகளை கொள்ளையடித்த வழக்கில் 5பேரை போலீசார் கைது செய்தனர்.

Aug 9, 2023 - 17:05
0
ஏற்றுமதி நிறுவன குடோனில் ரூ.3லட்சம் முந்திரி பருப்பு கொள்ளை : 5பேர் கைது!

தூத்துக்குடியில் ஏற்றுமதி நிறுவன குடோனில் வாட்ச்மேனை கத்தியை காட்டி மிரட்டி ரூ.3.20 லட்சம் மதிப்புள்ள முந்திரிபருப்பு மூட்டைகளை கொள்ளையடித்த வழக்கில் 5பேரை போலீசார் கைது செய்தனர். 

தூத்துக்குடி பால்பாண்டி நகரை சேர்ந்த ராஜன் மகன் பால்ராஜ் (48) என்பவர் முந்திரிபருப்புகளை வாங்கி வெளிநாடுகளுக்கு ஏற்றுமதி செய்யும் நிறுவனம் நடத்தி வருகிறார். மேலும் இவர் முத்தையாபுரம் காவல் நிலைய எல்லைக்குட்பட்ட திருச்செந்தூர் - தூத்துக்குடி சாலை பகுதியிலுள்ள ஒரு குடோனை வாடகைக்கு எடுத்து அதில் முந்திரிபருப்பு மூட்டைகளை ஏற்றுமதி செய்வதற்காக வைத்திருந்துள்ளார்.

இந்நிலையில் கடந்த 7ஆம் தேதி இரவு மேற்படி குடோனிற்கு இருசக்கர வாகனம் மற்றும் சரக்கு வாகனத்தில் வந்த மர்ம நபர்கள் அங்கு இருந்த வாட்ச்மேனை கத்தியை காட்டி மிரட்டி குடோன் ஷட்டரின் பூட்டை உடைத்து அங்கு இருந்த 40 முந்திரிபருப்பு மூட்டைகளை சரக்கு வாகனத்தில் கொள்ளையடித்து சென்றுள்ளனர். இதுகுறித்து மேற்படி பால்ராஜ் அளித்த புகாரின் பேரில் முத்தையாபுரம் காவல் நிலைய ஆய்வாளர் செந்தில்குமார் வழக்குபதிவு செய்து விசாரணை மேற்கொண்டார்.

இச்சம்பவம் தொடர்பாக மாவட்ட காவல் கண்காணிப்பாளர் எல். பாலாஜி சரவணன் உத்தரவின்படி துணை கண்காணிப்பாளர் சத்தியராஜ் மேற்பார்வையில் தெர்மல்நகர் காவல் நிலைய தலைமை காவலர் மாணிக்கராஜ், முதல் நிலை காவலர் மகாலிங்கம், மத்தியபாகம் காவல் நிலைய முதல் நிலை காவலர் செந்தில், முத்தையாபுரம் காவல் நிலைய முதல் நிலை காவலர் சாமுவேல், காவலர் முத்துப்பாண்டி மற்றும் தென்பாகம் காவல் நிலைய காவலர் திருமணிராஜன் ஆகியோர் அடங்கிய தூத்துக்குடி உட்கோட்ட தனிப்படை போலீசார் தீவிர விசாரணை மேற்கொண்டனர்.

இதில், தூத்துக்குடி பெரியசாமி நகர் பாலம் பகுதியை சேர்ந்தவர்களான மூர்த்தி மகன்களான அழகர் (27), மணிகண்டன் (32), வேலுசாமி மகன் மாரிமுத்து (20), பிரையண்ட் நகரை சேர்ந்த தங்கராஜ் மகன் சுரேஷ் (20) மற்றும் முத்தையாபுரம் சுந்தர்நகரை சேர்ந்த செல்லப்பாண்டி மகன் அஜித்குமார் (26) ஆகியோர் குடோனில் வாட்ச்மேனை கத்தியை காட்டி மிரட்டி முந்திரிபருப்பு மூட்டைகளை சரக்கு வாகனத்தில் கொள்ளையடித்து சென்றது தெரியவந்தது.

உடனே தனிப்படை போலீசார் அவர்கள் 5 பேரையும் கைது செய்து கொள்ளையடித்து சென்ற ரூ.3லட்சத்து 20ஆயிரம் மதிப்புள்ள 3 டன் 200 கிலோ முந்திரிபருப்பு மூட்டைகள் மற்றும் கொள்ளையடித்து செல்ல பயன்படுத்திய சரக்கு வாகனத்தையும் பறிமுதல் செய்தனர். மேலும் இதுகுறித்து முத்தையாபுரம் காவல் நிலைய போலீசார் விசாரணை மேற்கொண்டு வருகின்றனர். இவ்வழக்கில் குற்றவாளிகளை விரைந்து கைது செய்ததனிப்படை போலீசாரை மாவட்ட காவல் கண்காணிப்பாளர் எல். பாலாஜி சரவணன் பாராட்டினார்.

Tags: