தூத்துக்குடி லாரி செட் காவலாளி கொலை வழக்கில் சூப்பர்வைசர் கைது!

தூத்துக்குடியில் லாரி செட்டில் காவலாளி வெட்டிக்கொலை செய்யப்பட்ட வழக்கில் ஒருவர் கைது செய்யப்பட்டுள்ளார்.

தூத்துக்குடி கோரம்பள்ளத்தைச் சேர்ந்தவர் ஞானராஜ் (55). இவர் தூத்துக்குடி 3-வது மைல் பகுதியில் உள்ள ஒரு லாரி செட்டில் காவலாளியாக வேலைபார்த்து வந்தார். இன்று அதிகாலை அவர் அரிவாளால் வெட்டிக் கொலை செய்யப்பட்டு பிணமாக கிடந்தார். இதுகிறத்து தகவல் அறிந்து தென்பாகம் போலீஸ் இன்ஸ்பெக்டர் ராஜாராம் மற்றும் போலீசார் சம்பவ இடத்திற்கு விரைந்து சென்று ஞானராஜ் உடலை கைப்பற்றி பிரேத பரிசோதனைக்காக தூத்துக்குடி அரசு மருத்துவமனைக்கு அனுப்பி வைத்தனர். 

போலீசார் விசாரணை நடத்தியதில், கோரம்பள்ளம் பொன்னகரத்தைச் சேர்ந்த ஜோசப் மகன் ஜெயக்குமார் (50) என்பவர் அந்நிறுவனத்தில் சூப்பர்வைசராக வேலை பார்த்து வந்துள்ளார். அவர் அடிக்கடி மது குடித்துவிட்டு வந்ததால் சமீபத்தில் அவரை வேலையை விட்டு நிறுத்தி விட்டார்களாம். இதற்கு காவலாளி ஞானராஜ்தான் காரணம் என்று அவர் ஆத்திரம் அடைந்துள்ளார். இதையடுத்து அவர் நேற்றிரவு லாரி செட்டில் இருந்த ஞானராஜை வெட்டிக் கொலை செய்தது விசாரணையில் தெரியவந்தது. இதையடுத்து போலீசார் அவரை கைது செய்தனர்.