தூத்துக்குடி மாவட்டத்தில் புதிய இ-சேவை மையங்கள் தொடங்க விண்ணப்பிக்கலாம்: ஆட்சியர் தகவல்!

இதுகுறித்து மாவட்ட ஆட்சியர் கி.செந்தில்ராஜ், ஜூன் 8 ஆம் தேதி வெளியிட்ட செய்திக்குறிப்பு : தமிழ்நாட்டில் அனைத்து குடிமக்களும் இ-சேவை மையம் தொடங்குவதற்கு வழிவகை செய்யப்பட்டுள்ளது. இத்திட்டமானது படித்த இளைஞர்களையும், தொழில் முனைவோர்களையும் ஊக்குவிக்கும் வகையில் இ-சேவை மையம் இல்லாத பகுதிகளில் இ-சேவை மையங்களை நிறுவி செயல்படுத்த இத்திட்டம் துவங்கப்பட்டுள்ளது.

இந்த திட்டத்தின் நோக்கமானது இ-சேவை மையங்களின் எண்ணிக்கையை அதிகரித்து, இ-சேவை மையத்தில் மக்கள் காத்திருக்கும் நேரத்தை குறைத்து, மக்களுக்கு சிறந்த மற்றும் நேர்த்தியான சேவையை வழங்குவதாகும். இத்திட்டம் மூலம் தற்போது தூத்துக்குடி மாவட்டத்தில் முதல் கட்டமாக 294 இ-சேவை மையங்கள் செயல்பட அனுமதி வழங்கப்பட்டுள்ளது.  இந்நிலையில் முதல்; கட்டத்தில் விண்ணப்பிக்க இயலாதவர்களுக்கு மறுவாய்ப்பு வழங்கும் விதமாக, தற்போது இரண்டாம் கட்டமாக விண்ணப்பங்கள் வரவேற்கப்படுகின்றது.

இத்திட்டத்தில் விண்ணப்பம் செய்திட இ-சேவை வலைத்தளத்திலிருந்து (www.tnesevai.tn.gov.in, www.tnega.tn.gov.in) இணையவழி சேவைகளை மக்களுக்கு வழங்கும் "அனைத்து குடிமக்களும் இ-சேவை மையங்களை தொடங்கும் இத்திட்டத்தில்" பயன்பெற விண்ணப்பதார்கள் 01.06.2023 அன்று காலை 11.30 மணி முதல் 30.06.2023 அன்று இரவு 08.00 மணி வரை http://www.tnesevai.tn.gov.in/CSConlineReg_SchemeandRole.aspx எனும் இணையதள முகவரி மூலம் விண்ணப்பிக்கலாம். விண்ணப்பக் கட்டணமாக, கிராமப்புறங்களில் உள்ள மையங்களுக்கு ரூ.300-ம் நகர்ப்புற மையங்களுக்கு ரூ.6000ம் நிர்ணயம் செய்யப்பட்டுள்ளது. 

இவ்விண்ணப்பக் கட்டணத்தினை மேற்கூறிய இணையதள முகவரி மூலமாக ஆன்லைன் முறையில் மட்டுமே செலுத்திட வேண்டும்.விண்ணப்பதாரர்களுக்குரிய பயனர் எண் மற்றும் கடவுச் சொல் (User ID & Password) விண்ணப்பத்தில் அவர்களால் வழங்கப்பட்ட தொலைபேசி எண் மற்றும் மின்னஞ்சல் முகவரி வாயிலாக வழங்கப்படும் என்று தெரிவிக்கப்படுகிறது. மேலும், அருகிலுள்ள இ-சேவை மையங்களின் தகவல்களை Playstore-ல் உள்ள "முகவரி" ஆண்ட்ராய்டு மொபைல் செயலியைப் பயன்படுத்திக் காணலாம் அல்லது http://.tnega.tn.gov.in என்ற இணையதளத்தில் காணலாம் என மாவட்ட ஆட்சியர் கி.செந்தில்ராஜ், இ.ஆ.ப., அவர்கள் தெரிவித்துள்ளார்.