மின் மோட்டாரை தொட்ட 11 மாத குழந்தை... அடுத்த நொடியே நேர்ந்த விபரீதம்! தூத்துக்குடியில் பாட்டி வீட்டில் விளையாடிய குழந்தை பரிதாப பலி

தூத்துக்குடி: தூத்துக்குடி திரேஸ்புரம் பகுதியில் பாட்டி வீட்டிற்கு சென்றிருந்த 11 மாத ஆண் குழந்தை, வீட்டின் முன்புறத்தில் விளையாடிக் கொண்டிருந்தபோது இயங்கிக் கொண்டிருந்த நீரேற்றும் மின் மோட்டாரை எதிர்பாராதவிதமாக தொட்டதில் மின்சாரம் தாக்கி பரிதாபமாக உயிரிழந்த சம்பவம் அப்பகுதியில் பெரும் சோகத்தை ஏற்படுத்தியுள்ளது.

தூத்துக்குடி திரேஸ்புரம் சங்கு மால் பகுதியைச் சேர்ந்தவர் பிரபாகரன். இவரது மனைவி பாஸ்டினா. இந்த தம்பதியரின் 11 மாத ஆண் குழந்தை மகிழன்.

இந்நிலையில், பாஸ்டினா தனது 11 மாத குழந்தை மகிழனை அழைத்துக்கொண்டு திரேஸ்புரம் தீர்த்தக்கரை பிள்ளையார் கோவில் அருகே உள்ள தனது தாயார் வீட்டிற்கு சென்றுள்ளார்.

அங்கு வீட்டின் முன்புறத்தில் குழந்தை மகிழன் விளையாடிக் கொண்டிருந்ததாக கூறப்படுகிறது. அப்போது அருகில் இயங்கிக் கொண்டிருந்த நீரேற்றும் மின் மோட்டாரை குழந்தை எதிர்பாராதவிதமாக தொட்டுள்ளது.

மின் மோட்டாரில் இருந்து பாய்ந்த மின்சாரம் குழந்தையை தாக்கியதில், மகிழன் தூக்கி வீசப்பட்டதாக கூறப்படுகிறது. இந்த விபத்தில் குழந்தை சம்பவ இடத்திலேயே பரிதாபமாக உயிரிழந்ததாக தெரிவிக்கப்பட்டுள்ளது.

குழந்தையின் அலறல் சத்தம் கேட்டு பெற்றோர் மற்றும் உறவினர்கள் உடனடியாக அங்கு ஓடி வந்துள்ளனர். பின்னர் குழந்தையை மீட்டு சிகிச்சைக்காக மருத்துவமனைக்கு அழைத்துச் சென்றனர்.

ஆனால் குழந்தையை பரிசோதித்த மருத்துவர்கள், மகிழன் ஏற்கனவே உயிரிழந்துவிட்டதாக தெரிவித்துள்ளனர்.

இந்த துயர சம்பவம் குறித்து தூத்துக்குடி வடபாகம் காவல் நிலைய போலீசார் வழக்குப்பதிவு செய்து விசாரணை நடத்தி வருகின்றனர்.

பாட்டி வீட்டில் விளையாடிக் கொண்டிருந்த 11 மாத குழந்தை மின் மோட்டாரை தொட்டதில் மின்சாரம் தாக்கி உயிரிழந்த சம்பவம் திரேஸ்புரம் பகுதியில் பெரும் அதிர்ச்சியையும் சோகத்தையும் ஏற்படுத்தியுள்ளது.

சிறு குழந்தைகள் விளையாடும் பகுதிகளில் மின் மோட்டார்கள், மின் வயர்கள் மற்றும் மின்சார சாதனங்கள் பாதுகாப்பான நிலையில் உள்ளதா என்பதை உறுதி செய்வது அவசியம் என்பதையும் இந்த சம்பவம் உணர்த்தியுள்ளது.