தூத்துக்குடி சிவன் கோவில் செயல் அலுவலர் திடீர் சஸ்பெண்ட்... பெருமாள் கோவில் கும்பாபிஷேகத் திருப்பணியில் பல கோடி ரூபாய் முறைகேடு புகார் – இந்து சமய அறநிலையத்துறை அதிரடி நடவடிக்கை!

தூத்துக்குடி மாநகரின் மையப்பகுதியில் அமைந்துள்ள அருள்மிகு சங்கர ராமேஸ்வரர் திருக்கோவில் மற்றும் ஸ்ரீதேவி, பூதேவி சமேத வைகுண்டபதி பெருமாள் கோவில் ஆகியவற்றின் செயல் அலுவலராகப் பணியாற்றி வந்த தமிழ்ச்செல்வி பணியிடை நீக்கம் செய்யப்பட்டுள்ளார். பெருமாள் கோவில் கும்பாபிஷேகத் திருப்பணிக்காக வசூலிக்கப்பட்ட நன்கொடை மற்றும் கோவில் வங்கிக் கணக்கில் இருந்த நிதியில் பல கோடி ரூபாய் முறைகேடு நடைபெற்றதாக எழுந்த புகாரின் அடிப்படையில் இந்த நடவடிக்கை எடுக்கப்பட்டுள்ளதாகத் தகவல்கள் வெளியாகியுள்ளன.

கடந்த மூன்று ஆண்டுகளாக இக்கோவில்களின் செயல் அலுவலராகத் தமிழ்ச்செல்வி பணியாற்றி வந்தார். இந்நிலையில், நவம்பர் 13-ஆம் தேதி மாலை தூத்துக்குடி மாவட்ட இந்து சமய அறநிலையத்துறை இணை ஆணையர் சௌ. சாலி, அவரைப் பணியிடை நீக்கம் செய்து உத்தரவிட்டார்.

இதற்கிடையே, தூத்துக்குடி சிவன் கோவில் செயல் அலுவலர் பொறுப்பை குலசேகரன்பட்டினம் அருள்மிகு முத்தாரம்மன் திருக்கோவில் செயல் அலுவலர் வள்ளிநாயகம் கூடுதலாகக் கவனிப்பார் என்றும் உத்தரவில் தெரிவிக்கப்பட்டுள்ளது.

ரூ.4 கோடி வங்கி இருப்பு; நன்கொடை வசூலிலும் முறைகேடு புகார்!

வைகுண்டபதி பெருமாள் கோவிலில் கும்பாபிஷேகம் நடத்துவதற்காகக் கடந்த 2016-ஆம் ஆண்டு பாலாலயம் செய்யப்பட்டு திருப்பணிகள் நடைபெற்று வருகின்றன. கடந்த 2023-ஆம் ஆண்டு தமிழ்ச்செல்வி செயல் அலுவலராகப் பொறுப்பேற்றிருந்த காலகட்டத்தில், கும்பாபிஷேகத் திருப்பணிக்காகப் பக்தர்களிடம் நன்கொடைகள் வசூலிக்கப்பட்டதாகவும், கோவிலின் வங்கிக் கணக்கில் இருந்த சுமார் ரூ.4 கோடி நிதி எடுக்கப்பட்டதாகவும் கூறப்படுகிறது.

இந்நிலையில், திருப்பணிகளுக்காக வசூலிக்கப்பட்ட நன்கொடை மற்றும் வங்கிக் கணக்கிலிருந்து எடுக்கப்பட்ட நிதி ஆகியவற்றில் பல கோடி ரூபாய் முறைகேடு நடைபெற்றுள்ளதாகப் புகார்கள் எழுந்தன.

முதலமைச்சருக்கு புகார் மனு!

இதுதொடர்பாக இந்து முன்னணி, இந்து மக்கள் கட்சி மற்றும் கோவில் உபயதாரர்கள் சார்பில் தமிழக முதலமைச்சருக்கு புகார் மனுக்கள் அனுப்பப்பட்டன.

அந்த மனுக்களில், பெருமாள் கோவில் கும்பாபிஷேகம் கடந்த 9 ஆண்டுகளாக நடைபெறாமல் தாமதப்படுத்தப்பட்டு வருவதாகவும், திருப்பணிக்காகச் செலவிடப்பட வேண்டிய நிதியில் பல கோடி ரூபாய் முறைகேடு செய்யப்பட்டுள்ளதாகவும் குற்றம்சாட்டப்பட்டிருந்தது. மேலும், இதுகுறித்து உரிய விசாரணை நடத்தி நடவடிக்கை எடுக்க வேண்டும் என்றும் வலியுறுத்தப்பட்டிருந்தது.

அதிகாரிகள் தீவிர விசாரணை!

இந்தப் புகார்களின் அடிப்படையில் இந்து சமய அறநிலையத்துறை இணை ஆணையர் விசாரணை நடத்தியதாகவும், அதில் நிதி முறைகேடு தொடர்பான புகார்கள் தீவிரமாகப் பரிசீலிக்கப்பட்டதைத் தொடர்ந்து தமிழ்ச்செல்வி பணியிடை நீக்கம் செய்யப்பட்டுள்ளதாகவும் கூறப்படுகிறது.

மேலும், தமிழ்ச்செல்வி தூத்துக்குடி மாவட்டத்தில் உள்ள வேறு சில கோவில்களுக்கும் பொறுப்பு அதிகாரியாகப் பணியாற்றியுள்ளதால், அந்தக் கோவில்களின் வரவு–செலவு கணக்குகளிலும் முறைகேடுகள் ஏதேனும் நடைபெற்றுள்ளனவா என்பது குறித்தும் அதிகாரிகள் விசாரணை மேற்கொண்டு வருவதாகத் தெரிகிறது.

இந்தச் சம்பவம் தூத்துக்குடி சிவன் மற்றும் பெருமாள் கோவில் அறங்காவலர்கள், பட்டர்கள், உபயதாரர்கள் மட்டுமின்றி மாவட்டத்தின் பிற கோவில் பணியாளர்கள் மத்தியிலும் பெரும் பரபரப்பை ஏற்படுத்தியுள்ளது.

கோவில் திருப்பணிக்காகப் பக்தர்கள் வழங்கிய நன்கொடை எவ்வாறு செலவிடப்பட்டது? ரூ.4 கோடி வங்கி இருப்புத் தொகைக்கு என்ன ஆனது? கும்பாபிஷேகம் எப்போது நடைபெறும்? என்ற கேள்விகள் பக்தர்கள் மத்தியில் எழுந்துள்ளன.