டிஎன்பிஎஸ்சி தேர்வுகளுக்கு இலவச பயிற்சி வகுப்புகள் : ஜூலை 14ல் தொடங்குகிறது!

தூத்துக்குடியில் டிஎன்பிஎஸ்சி குரூப் I, குரூப் II முதல்நிலை தேர்வுகளுக்கான நேரடி இலவச பயிற்சி வகுப்புகள் வருகிற 14ஆம் தேதி தாெடங்குகிறது. 

இது தொடர்பாக ஆட்சியர் கி.செந்தில்ராஜ், வெளியிட்ட செய்திக்குறிப்பு: தமிழ்நாடு அரசுப் பணியாளர் தேர்வாணையத்தின் 2023-ஆம் ஆண்டிற்கான ஆண்டு திட்ட நிரலில் TNPSC தொகுதி- I தேர்விற்கான அறிவிப்பு ஆகஸ்ட் 2023 ம் மாதத்தில் வெளியிடப்படவுள்ளதாக தெரிவிக்கப்பட்டுள்ளது. TNPSC தொகுதி- I மற்றும் தொகுதி - II முதல்நிலை தேர்வுகளுக்கான ஒருங்கிணைந்த இலவச நேரடி பயிற்சி வகுப்புகள் தூத்துக்குடி மாவட்ட வேலைவாய்ப்பு மற்றும் தொழில்நெறி வழிகாட்டும் மையத்தில் 14.07.2023 வெள்ளிக்கிழமை பிற்பகல் 2.30 மணிக்கு தொடங்கப்படவுள்ளது.

இந்த பயிற்சி வகுப்புகள் வாரத்தின் அனைத்து நாட்களிலும் காலை நேரத்தில் நடைபெறும். இப்போட்டித் தேர்வுக்கு தேவையான அனைத்து புத்தகங்களும் மாவட்ட வேலைவாய்ப்பு அலுவலக நூலகத்தில் பராமரிக்கப்பட்டு வருகிறது. TNPSC தொகுதி- I மற்றும் தொகுதி - II தேர்வுகளுக்கு தயாராகும் போட்டித் தேர்வு ஆர்வலர்கள் இந்த பயிற்சி வகுப்புகளில் இணைந்து பயன் பெறலாம். கல்வித்தகுதி- ஏதேனும் இளங்கலை பட்டப்படிப்பில் தேர்ச்சி பெற்றிருக்க வேண்டும். TNPSC தொகுதி- IV தேர்வுக்கு தயாராகும் போட்டித் தேர்வு ஆர்வலர்களும் இந்த பயிற்சி வகுப்புகளில் இணைந்து பயன் பெறலாம். 

 பயிற்சி வகுப்பு தொடர்பான கூடுதல் விபரங்களை 0461-2340159 என்ற தொலைபேசி எண்ணில் தொடர்பு கொண்டு தெரிந்து கொள்ளலாம்.மேற்குறிப்பிட்டுள்ள TNPSC போட்டித் தேர்வுகளுக்கு தயாராகும் தேர்வர்கள் தங்களது வேலைவாய்ப்பு அடையாள அட்டை நகல், கல்விச்சான்றிதழ் நகல்கள் மற்றும் பாஸ்போர்ட் அளவு புகைப்படத்துடன் தூத்துக்குடி மாவட்ட வேலைவாய்ப்பு மற்றும் தொழில்நெறி வழிகாட்டும் மையத்தை அலுவலக வேலைநாட்களில் நேரடியாக தொடர்பு கொண்டு இலவச பயிற்சி வகுப்பில் சேர்ந்து பயன்பெறுமாறு மாவட்ட ஆட்சியர் தெரிவித்துள்ளார்.