முத்துநகர் கடற்கரையில் 20 ஆண்டுகளாக சிறுதொழில் செய்து வரும் வியாபாரிகளுக்கு நெருக்கடி? – கடைகளை தொடர்ந்து நடத்த அனுமதி கோரி மாநகராட்சியில் பொதுமக்கள் மனு!

தூத்துக்குடி: தூத்துக்குடி முத்துநகர் கடற்கரையில் கடந்த 2006-ம் ஆண்டு முதல் பானிபூரி, ஐஸ்கிரீம் உள்ளிட்ட சிறு வியாபாரங்களில் ஈடுபட்டு வரும் வியாபாரிகளின் கடைகளை தொடர்ந்து நடத்த அனுமதி வழங்க வலியுறுத்தி, பாதிக்கப்பட்ட வியாபாரிகள் மற்றும் பொதுமக்கள் தூத்துக்குடி மாநகராட்சி அலுவலகத்தில் மனு அளித்தனர்.

இதனைத் தொடர்ந்து செய்தியாளர்களைச் சந்தித்த அவர்கள் கூறியதாவது:

தூத்துக்குடி முத்துநகர் கடற்கரையில் கடந்த 2006-ம் ஆண்டு முதல் சிறு வியாபாரிகள் பானிபூரி, ஐஸ்கிரீம் உள்ளிட்ட சிறு வியாபாரங்களை மேற்கொண்டு வருகின்றனர். அப்போது அனைவரும் ஒற்றுமையாக தங்களுக்குள் எந்தவிதமான பிரச்சினைகளும், போட்டி பொறாமைகளும் ஏற்படாமல் தனித்தனியாக கடைகளை அமைத்து தொழில் செய்து கொள்ள அறிவுறுத்தப்பட்டது. அதன்படி கடந்த 20 ஆண்டுகளாக எந்தவித பிரச்சினையும் இல்லாமல் வியாபாரம் நடைபெற்று வந்தது.

இந்நிலையில், கடந்த வாரம் திடீரென மாநகராட்சி நிர்வாகத்தின் சார்பில் கடைகளை அகற்ற வேண்டும் என்றும், குறிப்பிட்ட தேதிக்குள் கடைகளை காலி செய்ய வேண்டும் என்றும் நோட்டீஸ் வழங்கப்பட்டதாகக் கூறப்படுகிறது. இதனால் அதிர்ச்சியடைந்த வியாபாரிகள் மாநகராட்சி மேயர் மற்றும் ஆணையரை நேரில் சந்தித்து விளக்கம் கேட்டுள்ளனர்.

அப்போது, வழக்கம்போல் கடைகளை நடத்திக் கொள்ளலாம் என்றும், இதுதொடர்பாக எந்தப் பிரச்சினையும் இல்லை என்றும் மேயர் மற்றும் ஆணையர் தரப்பில் உறுதியளிக்கப்பட்டதாக வியாபாரிகள் தெரிவித்தனர்.

மேலும், இந்தச் சிறு வியாபாரங்களையே வாழ்வாதாரமாக நம்பி ஏராளமான குடும்பங்கள் உள்ளன. குறிப்பாக சனி, ஞாயிறு ஆகிய வார இறுதி நாட்களில் மட்டுமே வியாபாரம் நடைபெறுவதால், ஒரு வாரத்திற்கு ரூ.2,000 முதல் ரூ.3,000 வரை மட்டுமே வருமானம் கிடைக்கிறது. இதனை வைத்தே குடும்பச் செலவுகளைச் சமாளித்து வருகின்றனர்.

மாநகராட்சிக்கு ஒவ்வொரு கடைக்கும் தினமும் ரூ.50 வீதம் வாடகையாகச் செலுத்தி வந்துள்ளனர். கடந்த 2006-ம் ஆண்டு முதல் 2026-ம் ஆண்டு வரை சுமார் 20 ஆண்டுகளாக மாநகராட்சிக்கு முறையாக வாடகை செலுத்தி தொழில் செய்து வந்த நிலையில், தற்போது திடீரென கடைகளை காலி செய்யுமாறு அறிவுறுத்துவது தங்களின் வாழ்வாதாரத்தைப் பாதிக்கும் என வேதனை தெரிவித்தனர்.

மேலும், சில வியாபாரிகள் மகளிர் சுயஉதவிக் குழு கடன் உள்ளிட்ட கடன்களைப் பெற்று இந்தத் தொழிலில் ஈடுபட்டு வருவதுடன், அந்த வருமானத்தைக் கொண்டே கடன்களையும் திருப்பிச் செலுத்தி வருகின்றனர்.

தற்போது கடைகளுக்கு அதிக தொகை கேட்கப்படுவதாகவும், சில இடங்களில் ரூ.10 லட்சம் முதல் ரூ.20 லட்சம் வரை கேட்கப்படுவதாகத் தகவல்கள் கிடைத்துள்ளதாகவும் தெரிவித்தனர். இருப்பினும், கடைகளின் விலை நிர்ணயம் மற்றும் டெண்டர் தொடர்பான முழுமையான விவரங்கள் தங்களுக்குத் தெரியவில்லை என்றும் கூறினர்.

எனவே, பல ஆண்டுகளாக முத்துநகர் கடற்கரையில் சிறுதொழில் செய்து வரும் ஏழை, எளிய வியாபாரிகளின் வாழ்வாதாரத்தை கருத்தில் கொண்டு, அவர்களுக்கு முன்னுரிமை அளித்து பழைய நடைமுறையிலேயே தொடர்ந்து கடைகளை நடத்த மாநகராட்சி நிர்வாகம் அனுமதி வழங்க வேண்டும். வியாபாரிகளுக்கு பாதிப்பு ஏற்படாத வகையில் சாதகமான முடிவை எடுக்க வேண்டும் என மாநகராட்சி நிர்வாகத்திடம் கோரிக்கை விடுத்துள்ளனர்.

20 ஆண்டுகளாக நம்பி வந்த சிறுதொழில் தொடருமா? அல்லது கடைகளை காலி செய்ய வேண்டிய நிலை ஏற்படுமா? என்ற எதிர்பார்ப்பில் முத்துநகர் கடற்கரை சிறு வியாபாரிகள் மாநகராட்சி நிர்வாகத்தின் முடிவை எதிர்நோக்கி காத்திருக்கின்றனர்.