நாசரேத் மர்காஷிஸ் மேல்நிலைப் பள்ளியில் ஓய்வுபெறும் ஆசிரியைகளுக்கு பணி நிறைவு பாராட்டு விழா
நாசரேத் மர்காஷிஸ் மேல்நிலைப் பள்ளியில் ஓய்வுபெறும் ஆசிரியைகளுக்கு பணி நிறைவு பாராட்டு விழா நடைபெற்றது.
விழாவிற்கு, பள்ளியின் தாளாளர் சுதாகர் தலைமை தாங்கினார். தலைமையாசிரியர் குணசீலராஜ் முன்னிலை வகித்தார். தமிழ் ஆசிரியர் அம்புரோஸ் சுகிர்தராஜ் ஆரம்ப ஜெபம் செய்தார். பணியில் இருந்து ஓய்வுபெறும் பட்டதாரி அறிவியல் ஆசிரியை ரோஸ்லின் எஸ்தர், பட்டதாரி வரலாற்று ஆசிரியை கிருபாவதி ருத் ஆகியோருக்கு பணி நிறைவு பாராட்டு விழா நடைபெற்றது. தொழிற்கல்வி ஆசிரியர் ஜெய்சன் பாபு, அறிவியல் ஆசிரியை ஜெயந்தி சுபாஷினி ஆகியோர் வாழ்த்துரை வழங்கினர்.
ஓய்வுபெறும் ஆசிரியைகளுக்கு மர்காஷிஸ் மேல்நிலைப்பள்ளி ஆசிரியர்கள், அலுவலர்களின் சார்பில் தங்க மோதிரங்கள் பரிசாக வழங்கப்பட்டன. தங்க மோதிரங்களை உதவி தலைமை ஆசிரியை சாரா ஞானபாய் ஓய்வு பெறும் ஆசிரியைகளுக்கு அணிவித்தார். வாழ்த்து மடல்கள் வாசிக்கப்பட்டன. அதன்பின்னர், ஓய்வுபெறும் ஆசிரியைகள் இருவரும் தனித்தனியாக ஏற்புரை வழங்கினர். இயற்பியல் ஆசிரியர் ஜெர்சோம் ஜெபராஜ் நன்றி கூறினார். தமிழ் ஆசிரியை ஜெபகனி இறுதி ஜெபம் செய்து நிகழ்ச்சியை நிறைவு செய்தார். நிகழ்ச்சியில் மர்காஷிஸ் மேல்நிலைப்பள்ளியின் அனைத்து ஆசிரியர்கள், ஆசிரியைகள் மற்றும் அலுவலகப் பணியாளர்கள் கலந்து கொண்டனர்.
