விளாத்திகுளம் அருகே திடீரென வெடித்து சிதறிய பிரிட்ஜ்: போலீஸ் விசாரணை..!

பிரிட்ஜில் இருந்து கேஸ் லீக் ஆகி பிரிட்ஜ் தீ பற்றி எரிந்ததில் வீடு முழுவதும் தீ பரவி கரும்படலமாக மாறியதோடு மட்டுமின்றி வீட்டிலுள்ள பல பொருட்கள் தீக்கிறையாகி நாசமாகியுள்ளன....

Jan 11, 2023 - 21:57
0 225
விளாத்திகுளம் அருகே திடீரென வெடித்து சிதறிய பிரிட்ஜ்: போலீஸ் விசாரணை..!

தூத்துக்குடி மாவட்டம் விளாத்திகுளம் அருகே உள்ள அயன் பொம்மையாபுரம் கிராமத்தைச் சேர்ந்தவர் இராமர்(53) இவரது மனைவி கிருஷ்ணவேணி. இவர்கள் விவசாயப் பணியை மேற்கொண்டு வருகின்றனர். இவர்கள் இருவரும் வழக்கம்போல இன்று விவசாய பணிக்கும், இவர்களது மகனும், மகளும் கல்லூரிக்கும் சென்றுள்ளனர். இந்த நிலையில் வீட்டில் யாரும் இல்லாத நேரத்தில் பூட்டிய வீட்டில் புகை வருவதை கண்ட அக்கம்பக்கத்தினர் என்னவென்று சென்று பார்த்தபோது இராமரின் வீட்டில் இருந்த பிரிட்ஜ் முற்றிலுமாக கொழுந்துவிட்டு தீப்பற்றி எரிந்து கொண்டிருந்துள்ளது. இதனைக் கண்ட இராமரின் உறவினரான புவனேஸ்வரன் என்பவர் விளாத்திகுளம் தீயணைப்பு மற்றும் மீட்பு பணிகள் நிலையத்திற்கு தகவல் தெரிவித்ததோடு மட்டுமன்றி அக்கம் பக்கத்தினர் உதவியுடன் தண்ணீரை ஊற்றி தீயை அணைக்கும் முயற்சியில் ஈடுபட்டுள்ளார். 

 

இதையடுத்து தீயணைப்புத் துறை வீரர்கள் வருவதற்கு முன்பாகவே கிராம மக்கள் தண்ணீரை ஊற்றி தீயை அணைத்தனர். இதனால் வீடு முழுவதும் புகை மூட்டத்துடன், கரும்படலமாக மாறி காட்சியளித்தது. மேலும் வீட்டிலிருந்த கிரைண்டர், தையல் மிஷின் உட்பட பல பொருட்களும் தீயினால் கருகி சேதம் அடைந்துள்ளன. பின்னர் இது குறித்து தகவல் அறிந்து ராமரின் வீட்டிற்குச் சென்ற விளாத்திகுளம் காவல் நிலைய போலீசார் இந்த தீ விபத்து குறித்து வழக்கு பதிவு செய்து விசாரணை மேற்கொண்டனர். மேலும், பிரிட்ஜில் நிரப்பப்பட்டிருக்கும் கேஸ் லீக் ஆனதன் காரணமாக தான் பிரிட்ஜ் தீப்பிடித்து எரிந்திருக்கக்கூடும் என்று மின்சாரத் துறையினர் கூறுகின்றனர்.

Tags: