சாத்தான்குளம் அருகே பாத்திர கடையில் ரூ.10 ஆயிரம் திருட்டு!
பேய்க்குளத்தில் பாத்திர கடையில் பொருள் வாங்குவது போல் ரூ.10 ஆயிரத்தை திருடிய டிப்டாப் ஆசாமியை கைது செய்ய வேண்டும் என்று வியாபாரிகள் கோரிக்கை விடுத்துள்ளனர்.
தூத்துக்குடி மாவட்டம், சாத்தான்குளம் அருகே சாலைபுதூரைச் சேர்ந்தவர் கோயில்ராஜ் . இவர் பேய்க்குளம் கோமானேரி செல்லும் சாலையில் பாத்திர கடை நடத்தி வருகிறார். இவர் கடந்த 29ஆம்தேதி காலை கடையை திறந்து போது பைக்கில் வந்த டிப்டாப் நபர், கடைக்கு வந்து அவரிடம் டிபன் பாக்ஸ் கேட்டுள்ளார். அவர் டிபன் பாக்ஸை எடுக்க முயன்றபோது அவர் அறியாத நேரத்தில் டிப் டாப் ஆசாமி, பணம் பெட்டியில் இருந்த ரூ.10 ஆயிரத்தை எடுத்து விட்டு பைக்கில் தலைமறைவாகி விட்டாராம்.
கோயில்ராஜ் டிபன் பாக்ஸை எடுத்து டிப்டாப் ஆசாமியை தேடியபோது பணப்பெட்டியில் இருந்த ரூ 10 ஆயிரம் திருட்டு போனது தெரியவந்தது. இதனையடுத்து அவர் பேய்க்குளம் பஜாரில் பொருத்தப்பட்டுள்ள கண்காணிப்பு கேமராவில் பதிவுகளை ஆய்வு செய்தபோது பைக்கில் டிப்டாப் ஆசாமி வேகமாக செல்வது பதிவாகி இருந்தது.
உடன் கோயில்ராஜ், கண்காணிப்பு கேமராவில் பதிவான காட்சிகள் டிப்டாப் ஆசாமி பைக் எண் ஆகியவற்றை கொண்டு சாத்தான்குளம் காவல் நிலையத்தில் புகார் செய்தார். புகாரின் பேரில் போலீஸார் வழக்கு பதிவு செய்யாமல் விசாரணை நடத்தி வருவதாக தெரிவித்துள்ளனர். ஆதலால் அந்த பைக்கில் வந்த மர்ம நபரை அடையாளம் கண்டுபிடிக்க வேண்டும் என வியாபாரிகள் கோரிக்கை விடுத்துள்ளனர்.
