தூத்துக்குடியில் வாலிபர் கம்பால் தாக்கி கொலை : நண்பர்கள் வெறிச்செயல்!
தூத்துக்குடியில் மது குடிக்கும்போது ஏற்பட்ட தகராறில், வாலிபரை கம்பால் தாக்கி கொலை செய்த அவரது நண்பர்கள் 3பேரை போலீசார் தேடி வருகின்றனர்.
தூத்துக்குடி தாளமுத்து நகர், சோட்டையன் தோப்பைச் சேர்ந்தவர் பாலு மகன் விஜய் (25), இவர் நேற்று இரவு தனது நண்பர்கள் 3 பேருடன் தூத்துக்குடி லயன்ஸ் டவுன் மச்சாது பாலம் அருகே உள்ள ஒரு குடோன் முன்பு மதுபானம் அருந்தினார்களாம். அப்போது அவர்களுக்குள் தகராறு ஏற்பட்டுள்ளது. இந்த தகராறில் ஆத்திரமடைந்த அவரது நண்பர்கள் 3பேர் சேர்ந்து விஜய்யை சரமாரியாக கம்பால் தாக்கினார்களாம்.
இதில் பலத்த காயமடைந்த விஜய் அதே இடத்தில் பரிதாபமாக இறந்தார். உடனே 3 பேரும் அங்கிருந்து தப்பி ஓடி விட்டார்கள். இந்த சம்பவம் குறித்து தகவல் அறிந்த தென்பாகம் காவல் நிலைய இன்ஸ்பெக்டர் முருகன் மற்றும் போலீசார் சம்பவ இடத்திற்கு சென்று, அவரது உடலை மீட்டு பரிசோதனைக்காக அரசு மருத்துவமனைக்கு அனுப்பி வைத்தனர். மேலும் இது சம்பந்தமாக வழக்கு பதிவு செய்து கொலையாளிகளை தேடி வருகின்றனர். இந்த கொலை சம்பவம் அப்பகுதியில் பரபரப்பை ஏற்படுத்தி உள்ளது
