தூத்துக்குடியில் இரட்டை கொலை வழக்கில் சிசிடிவி காட்சிகள் வெளியானதால் 3 காவலர்கள் ஆயுதப்படைக்கு மாற்றம்..!
கயத்தார் அருகே இரட்டை கொலைவழக்கு தொடர்பான கண்காணிப்பு கேமரா காட்சிகள் வெளியான சம்பவம் தொடர்பாக 3 போலீஸ்காரர்கள் ஆயுதப்படைக்கு மாற்றப்பட்டுள்ளனர்.
தூத்துக்குடி மாவட்டம், கயத்தார் அருகே உள்ள தளவாய்புரத்தில் உள்ள டாஸ்மாக் மதுக்கூடத்தில் கடந்த 4 நாட்களுக்கு முன்பு மது குடித்து கொண்டு இருந்த மந்திரம், முருகன் ஆகிய 2 பேரும் வெட்டிக் கொலை செய்யப்பட்டனர். இது தொடர்பாக அந்த டாஸ்மாக் பாரில் இருந்த கண்காணிப்பு கேமிராவில் பதிவான காட்சிகள் சமூக வலைதளங்களில் வைரலாகி பரபரப்பை ஏற்படுத்தியது. இதைத் தொடர்ந்து போலீசார் விசாரணை நடத்தினர்.
விசாரணையில், கயத்தார் காவல் நிலையத்தில் பணியாற்றி வரும் போலீஸ்காரர் பால்தினகரன் என்பவர் வீடியோவை வெளியிட்டு இருப்பது தெரியவந்தது. அதே போன்று இந்த வீடியோவை ஏரல் காவல் நிலையத்தில் போலீஸ்காரர்களாக பணியாற்றி வரும் அஜ்மீர் காஜாமுகைதீன், அருண்குமார் ஆகியோர் தங்கள் செல்போனில் ஸ்டேட்டசாக வைத்து இருந்தார்களாம்.
இது குறித்து அறிந்த மாவட்ட எஸ்பி ஆல்பர்ட்ஜான், கயத்தார் போலீஸ்காரர் பால்தினகரன், ஏரல் போலீஸ்காரர்கள் அஜ்மீர் காஜாமுகைதீன், அருண்குமார் ஆகியோரை ஆயுதப்படைக்கு மாற்றம் செய்து உத்தரவிட்டார். மேலும் அவர்கள் மீது துறைரீதியான நடவடிக்கை எடுப்பது குறித்தும் ஆலோசனை நடந்துவருகிறது.
