தூத்துக்குடி விவசாயிகளே கவனத்திற்கு! செப்.17ல் குறைதீர்க்கும் நாள் கூட்டம் – குறைகள், கோரிக்கைகளை நேரில் தெரிவிக்கலாம்!

தூத்துக்குடி மாவட்ட விவசாயிகள் குறைதீர்க்கும் நாள் கூட்டம் வரும் செப்டம்பர் 17ஆம் தேதி நடைபெற உள்ளது. மாவட்ட விவசாயிகள் அனைவரும் பங்கேற்று, விவசாயம் தொடர்பான தங்களது குறைகள் மற்றும் கோரிக்கைகளை நேரடியாகத் தெரிவித்து பயன்பெறலாம் என மாவட்ட ஆட்சியர் விஷு மகாஜன் தெரிவித்துள்ளார்.

தூத்துக்குடி மாவட்டத்தில் விவசாயிகளின் குறைகள் மற்றும் கோரிக்கைகளுக்கு தீர்வு காணும் வகையில், ஒவ்வொரு மாதமும் விவசாயிகள் குறைதீர்க்கும் நாள் கூட்டம் நடைபெற்று வருகிறது. அந்த வகையில், 2026ஆம் ஆண்டு செப்டம்பர் மாதத்திற்கான விவசாயிகள் குறைதீர்க்கும் நாள் கூட்டம் வரும் 17.09.2026 அன்று வியாழக்கிழமை காலை 10 மணியளவில் நடைபெற உள்ளது.

இந்தக் கூட்டம் தூத்துக்குடி மாவட்ட ஆட்சியர் அலுவலக வளாகத்தில் உள்ள “முத்து அரங்கத்தில்” நடைபெறுகிறது.

கூட்டத்தில் தூத்துக்குடி மாவட்டத்தைச் சேர்ந்த விவசாயிகள் கலந்து கொண்டு, விவசாயம் தொடர்பான தங்களது குறைகள், பிரச்சினைகள் மற்றும் கோரிக்கைகளை அதிகாரிகளிடம் நேரடியாகத் தெரிவிக்கலாம்.

விவசாயிகளின் கோரிக்கைகள் மற்றும் குறைகள் தொடர்பாக சம்பந்தப்பட்ட துறை அதிகாரிகளிடம் எடுத்துரைத்து, உரிய நடவடிக்கைகள் மேற்கொள்ளப்படும் என்பதால், மாவட்டத்தைச் சேர்ந்த விவசாயப் பெருமக்கள் அனைவரும் இந்தக் கூட்டத்தில் கலந்து கொண்டு பயன்பெறுமாறு மாவட்ட ஆட்சியர் விஷு மகாஜன் கேட்டுக்கொண்டுள்ளார்.