கிராம சபைக்கூட்டத்தில் மனு அளித்த ஆதரவற்ற பெண்ணின் வீட்டிற்கு ஒரே நாளில் மின் இணைப்பு: ஆட்சியர் நடவடிக்கை!
கிராம சபைக்கூட்டத்தில் மனு அளித்த ஆதரவற்ற பெண்ணின் வீட்டிற்கு ஒரே நாளில் மின் இணைப்பு, பட்டா மற்றும் இலவச வீடு மாவட்ட ஆட்சியர் செந்தில்ராஜ், நடவடிக்கை மேற்கொண்டார்.
கிராம சபைக்கூட்டத்தில் மனு அளித்த ஆதரவற்ற பெண்ணின் வீட்டிற்கு ஒரே நாளில் மின் இணைப்பு, பட்டா மற்றும் இலவச வீடு மாவட்ட ஆட்சியர் செந்தில்ராஜ், நடவடிக்கை மேற்கொண்டார்.
உடன்குடி ஊராட்சி ஒன்றியம், நயினார்பத்து ஊராட்சி அம்மன்புரம் கிராமத்தை சேர்ந்தவர் சத்யபாமா. இவர் தனது கணவரால் கைவிடப்பட்ட நிலையில் இரு குழந்தைகளுடன் தனியாக வசித்து வருகிறார். மகாத்மா காந்தி தேசிய ஊரக வேலை உறுதி திட்டத்தில் வேலை பார்க்கும் சத்யபாமா அவர்களின் மகன் 5ம் வகுப்பும், மகள் 1ம் வகுப்பும் படித்து வருகின்றனர். நயினார்பத்து கிராம ஊராட்சியில் உலக தண்ணீர் தினத்தையொட்டி மாவட்ட ஆட்சியர் மரு.கி.செந்தில்ராஜ், தலைமையில் 22.03.2023 அன்று நடைபெற்ற கிராமசபைக் கூட்டத்தில் சத்யபாமா, தனது வீட்டிற்கு மின் இணைப்பு வேண்டி மாவட்ட ஆட்சியர் அவர்களிடம் மனு அளித்தார்.
மாவட்ட ஆட்சியர் தன் விருப்ப நிதியிலிருந்து வைப்புத்தொகை செலுத்தி சத்யபாமா அவர்களின் வீட்டிற்கு உடனடியாக மின் இணைப்பு வழங்க சம்பந்தப்பட்ட அலுவலர்களுக்கு உத்தரவிட்டார்கள். மேலும், அவர் குடியிருக்கும் இடத்திற்கு பட்டா மற்றும் ஊரக வளர்ச்சித்துறை மூலம் இலவச வீடு கட்டுவதற்கான நடவடிக்கையினையும் மேற்கொள்ள சம்பந்த அலுவலர்களுக்கு மாவட்ட ஆட்சியர் அறிவுறுத்தினார்கள். இதையடுத்து சத்யபாமா அவர்களின் வீட்டிற்கு மின் இணைப்பு மற்றும் பட்டா உடனடியாக வழங்கப்பட்டுள்ளது.
இதுதொடர்பாக சத்யபாமா தெரிவிக்கையில், பல ஆண்டுகளாக பலமுறை மனு அளித்தும் வீட்டிற்கு மின் இணைப்பு வழங்கவில்லை. எனவே கிராம சபைக்கூட்டத்தில் மாவட்ட ஆட்சியர் அவர்களிடம் மனு அளித்தேன். ஒரே நாளில் எனது வீட்டிற்கு மின் இணைப்பு மற்றும் பட்டா ஆகியவை வழங்கப்பட்டது. மனு அளித்த ஒரே நாளில் நடவடிக்கை எடுத்த மாவட்ட ஆட்சியர் அவர்களுக்கு எனது நன்றியை தெரிவித்துக் கொள்கிறேன் என்று தெரிவித்தார்.
