தூத்துக்குடி காவல்துறையினருக்கு பாராட்டு.. கொலை, நகை திருட்டு வழக்குகளில் சிறப்பாக புலனாய்வு செய்து குற்றவாளிகளுக்கு தண்டனை பெற்றுத் தந்த போலீசாருக்கு டிஐஜி நற்சான்றிதழ்

தூத்துக்குடி: தூத்துக்குடி மாவட்டத்தில் சிறப்பாக பணியாற்றிய காவல்துறையினரை திருநெல்வேலி சரக காவல்துறை துணைத் தலைவர் இரா. திருநாவுக்கரசு நேரில் அழைத்து பாராட்டி, நற்சான்றிதழ்களை வழங்கி கௌரவித்தார்.

தூத்துக்குடி மாவட்டம் ஆழ்வார்திருநகரி காவல் நிலைய எல்லைக்குட்பட்ட பகுதியில் நடைபெற்ற கொலை வழக்கில் தொடர்புடைய 5 குற்றவாளிகளுக்கு நீதிமன்றத்தின் மூலம் ஆயுள் தண்டனை பெற்றுத் தரப்பட்டது. இந்த வழக்கில் சிறப்பாக பணியாற்றிய காவல் ஆய்வாளர் ஜீன்குமார் மற்றும் முதல் நிலை பெண் காவலர் பூர்ணகலா ஆகியோரின் சிறப்பான பணியைப் பாராட்டி நற்சான்றிதழ் வழங்கப்பட்டது.

அதேபோல், தூத்துக்குடி மத்தியபாகம் காவல் நிலைய எல்லைக்குட்பட்ட பகுதியில் நடைபெற்ற தங்க நகை திருட்டு வழக்குகளில் தொடர்புடைய 2 குற்றவாளிகளுக்கு நீதிமன்றத்தின் மூலம் உரிய தண்டனை பெற்றுத் தரப்பட்டது.

இந்த வழக்குகளில் தீவிரமாக புலனாய்வு மேற்கொண்டு, தொடர்ந்து முயற்சி செய்து குற்றவாளிகளுக்கு தண்டனை பெற்றுத் தருவதில் முக்கிய பங்காற்றிய தலைமை காவலர் கணேசனின் பணியையும் பாராட்டி சான்றிதழ் வழங்கப்பட்டது.

இதையடுத்து, 16.08.2026 அன்று சிறப்பாக பணியாற்றிய காவல் ஆய்வாளர், தலைமை காவலர் மற்றும் முதல் நிலை பெண் காவலர் ஆகியோரை திருநெல்வேலி சரக காவல்துறை துணைத் தலைவர் இரா. திருநாவுக்கரசு நேரில் அழைத்து, அவர்களின் சிறப்பான பணியைப் பாராட்டினார்.

மேலும், காவல்துறையினரின் அர்ப்பணிப்பான பணியை ஊக்குவிக்கும் வகையில் அவர்களுக்கு நற்சான்றிதழ்களை வழங்கி வாழ்த்துகளை தெரிவித்தார்.

கொலை மற்றும் திருட்டு உள்ளிட்ட முக்கிய வழக்குகளில் திறம்பட புலனாய்வு மேற்கொண்டு, குற்றவாளிகளுக்கு நீதிமன்றத்தின் மூலம் தண்டனை பெற்றுத் தந்த காவல்துறையினருக்கு வழங்கப்பட்ட இந்த பாராட்டு, மற்ற காவலர்களுக்கும் ஊக்கமளிக்கும் வகையில் அமைந்துள்ளது.