தூத்துக்குடி வேலவன் ஜுவல்லர்ஸ் மீது நடவடிக்கை எடுக்க கோரி எஸ்.பி. அலுவலகத்தில் புகார்: “நகைகளை ஆய்வு செய்து விசாரிக்க வேண்டும்” – PMT கட்சி இசக்கி ராஜா

தூத்துக்குடி: தூத்துக்குடியில் பிரபல வேலவன் ஜுவல்லர்ஸ் நகைக்கடையில் வாங்கிய 5 பவுன் தாலிச் சங்கிலியில் கலப்படம் இருப்பதாகக் கூறி புகார் அளிக்கப்பட்டுள்ள நிலையில், சம்பந்தப்பட்ட நகைக்கடை மீது காவல்துறை வழக்குப்பதிவு செய்து உரிய விசாரணை நடத்த வேண்டும் என பி.எம்.டி. மக்கள் கட்சி தலைவர் இசக்கி ராஜா வலியுறுத்தியுள்ளார்.

தூத்துக்குடி பசும்பொன் நகர் பகுதியைச் சேர்ந்த ராஜ்குமார் என்பவர் சில மாதங்களுக்கு முன்பு வேலவன் ஜுவல்லர்ஸ் நிறுவனத்தில் 5 பவுன் தாலிச் சங்கிலி வாங்கியதாக கூறப்படுகிறது.

அந்த நகையை அவசர தேவைக்காக தூத்துக்குடி மூன்றாவது மைல் பகுதியில் உள்ள தனியார் நிதி நிறுவனத்தில் அடகு வைக்கச் சென்றபோது, நகையை சோதனை செய்ததில் அது முழுமையான தங்கமாக இல்லாமல் உலோகம் கலந்துள்ளதாக தெரியவந்ததாக ராஜ்குமார் தரப்பில் தெரிவிக்கப்பட்டுள்ளது.

இதுதொடர்பாக ராஜ்குமார் தூத்துக்குடி மத்திய பாகம் காவல் நிலையத்தில் புகார் அளித்ததாக கூறப்படுகிறது.

இதற்கிடையே, தங்கள் நிறுவனத்திடம் பணம் கேட்டு ஒரு கும்பல் மிரட்டி வருவதாகவும், தாங்கள் போலி நகைகளை விற்பனை செய்யவில்லை என்றும் வேலவன் ஜுவல்லர்ஸ் நிறுவனம் சார்பில் சமூக வலைதளங்களில் வீடியோ மூலம் கருத்துகள் தெரிவிக்கப்பட்டதாக கூறப்படுகிறது.

இந்த நிலையில், பி.எம்.டி. மக்கள் கட்சி தலைவர் இசக்கி ராஜா தலைமையில் கட்சி நிர்வாகிகள் தூத்துக்குடி மாவட்ட காவல் கண்காணிப்பாளர் அலுவலகத்தில் இன்று புகார் அளித்தனர்.

பின்னர் செய்தியாளர்களிடம் பேசிய இசக்கி ராஜா, நகையில் கலப்படம் இருப்பதாக கூறப்படும் விவகாரம் தொடர்பாக தங்க நகை தரச் சான்று நிறுவனம் மற்றும் நுகர்வோர் ஆணையத்திலும் புகார் அளித்துள்ளதாக தெரிவித்தார்.

மேலும், மத்திய பாகம் காவல் நிலையத்தில் ஏற்கனவே புகார் அளிக்கப்பட்டுள்ளதாகவும், இதுவரை வழக்குப்பதிவு செய்யப்படவில்லை எனவும் அவர் கூறினார். எனவே, இந்த விவகாரத்தில் காவல்துறை உரிய விசாரணை நடத்தி, சம்பந்தப்பட்ட நகைக்கடையில் உள்ள நகைகளையும் ஆய்வு செய்ய நடவடிக்கை எடுக்க வேண்டும் என வலியுறுத்தினார்.

தாலிச் சங்கிலி உள்ளிட்ட நகைகளை வாங்கும் பொதுமக்களின் நலனை கருத்தில் கொண்டு, மாவட்ட நிர்வாகமும் தமிழக அரசும் இந்த விவகாரத்தில் தலையிட்டு உரிய நடவடிக்கை எடுக்க வேண்டும் என்றும் அவர் கோரிக்கை விடுத்தார்.

மேலும், தங்களுக்கு எதிராக அவதூறான கருத்துகள் பரப்பப்படுவதாகவும், அவை தொடர்ந்தால் அடுத்தகட்டமாக பெரிய அளவில் போராட்டம் நடத்தப்படும் என்றும் இசக்கி ராஜா எச்சரிக்கை விடுத்தார்.

இந்த செய்தியில் இடம்பெறும் நகை கலப்படம் தொடர்பான குற்றச்சாட்டுகள் புகார் அளித்த தரப்பின் குற்றச்சாட்டுகளாகும். அவை தொடர்பான காவல்துறை விசாரணை அல்லது அதிகாரப்பூர்வ ஆய்வு முடிவுகள் வெளியாகும் வரை, குற்றச்சாட்டுகள் நிரூபிக்கப்பட்டவை எனக் கருத முடியாது.