தூத்துக்குடி ஹூண்டாய் கப்பல் கட்டும் தள திட்டம் அடுத்த கட்டத்திற்கு முன்னேற்றம் – DPR தயாரிப்புக்கு உலகளாவிய ஆலோசகர்கள் அழைப்பு

தூத்துக்குடியில் அமைய உள்ள ஹூண்டாய் கப்பல் கட்டும் தளத் திட்டம், விரிவான திட்ட அறிக்கை (DPR) தயாரிக்கும் நிலைக்கு முன்னேறியுள்ளதாக தமிழ்நாடு அரசு தெரிவித்துள்ளது. திட்டத்திற்கான தொழில்நுட்ப ஆய்வுகள், நிலம் கையகப்படுத்துதல், உள்கட்டமைப்பு பணிகள், சுற்றுச்சூழல் அனுமதிகள் உள்ளிட்ட பல்வேறு பணிகள் தீவிரமாக நடைபெற்று வருகின்றன.

விரிவான சாத்தியக்கூறு அறிக்கை தயாரிப்பு

தமிழ்நாடு அரசு மற்றும் ஹூண்டாய் நிறுவனத்துக்கு இடையே கப்பல் கட்டும் தளம் அமைப்பது தொடர்பாக புரிந்துணர்வு ஒப்பந்தம் கையெழுத்தானதைத் தொடர்ந்து, திட்டத்தை செயல்படுத்துவதற்கான பல்வேறு நடவடிக்கைகள் மேற்கொள்ளப்பட்டு வருகின்றன.

இதன் முக்கிய முன்னேற்றமாக, வ.உ.சி. துறைமுக ஆணையம், விரிவான சாத்தியக்கூறு அறிக்கை தயாரிப்பதற்கான பணி ஆணையை ஹூண்டாய் நிறுவனத்துடன் கலந்தாலோசித்து வழங்கியுள்ளது. மேலும், முன்மொழியப்பட்ட கப்பல் கட்டும் தளத்தில் தொடக்கப் பணிகளும் தொடங்கியுள்ளதாக அரசு தெரிவித்துள்ளது.

இதனுடன், விரிவான திட்ட அறிக்கை தயாரிப்பதற்காக உலகளாவிய ஆலோசகர்களைத் தேர்வு செய்ய கோரிக்கை முன்மொழிவு (RFP) வெளியிடப்பட்டுள்ளது. இதன் மூலம் கப்பல் கட்டும் தளம் மட்டுமின்றி, அதனைச் சுற்றியுள்ள கடல்சார் உற்பத்தி தொழில் சூழலை உருவாக்குவதற்கான சர்வதேச நிபுணத்துவம் பயன்படுத்தப்பட உள்ளது.

ஹூண்டாய் குழுவுடன் தொடர் ஆலோசனை

ஹூண்டாய் நிறுவனத்துடனான ஒருங்கிணைப்பு தொடர்ந்து நடைபெற்று வருகிறது. தொழில்துறை அமைச்சர் ஜூன் 2026-ல் ஹூண்டாயின் உல்சான் கப்பல் கட்டும் தளத்தை பார்வையிட்டார். இதனைத் தொடர்ந்து, ஹூண்டாய் நிறுவனத்தின் மூத்த பிரதிநிதிகள் குழு ஜூன் 17-ம் தேதி தமிழ்நாடு முதலமைச்சரை சந்தித்தது.

மேலும், Guidance Tamil Nadu, SIPCOT, வ.உ.சி. துறைமுக ஆணையம் உள்ளிட்ட துறைகள் இணைந்து வாராந்திர ஒருங்கிணைப்பு கூட்டங்களை நடத்தி, நிலம், தொழில்நுட்ப ஆய்வுகள், உள்கட்டமைப்பு, அனுமதிகள் மற்றும் உள்ளூர்மயமாக்கல் உள்ளிட்ட பணிகளை கண்காணித்து வருகின்றன.

10 நாள் தள ஆய்வு

ஹூண்டாய் நிறுவனத்தின் சன்ஜூன் ஹாங் தலைமையிலான மூத்த குழு செப்டம்பர் 1 முதல் 10-ம் தேதி வரை தமிழ்நாட்டில் 10 நாள் பயணம் மேற்கொண்டது.

இந்த குழு தூத்துக்குடியில் விரிவான தள ஆய்வை மேற்கொண்டதுடன், தொழில்துறை அமைச்சர், கூடுதல் தலைமைச் செயலாளர், கப்பல் போக்குவரத்து இயக்குனரக அதிகாரிகள், வ.உ.சி. துறைமுக ஆணையம் மற்றும் தூத்துக்குடி மாவட்ட நிர்வாக அதிகாரிகளை சந்தித்து ஆலோசனை நடத்தியது.

அப்போது ஊக்கத்தொகை கட்டமைப்பு, DPR தயாரிப்பு நிலை மற்றும் திட்டத்தின் ஒட்டுமொத்த காலவரிசை குறித்து விவாதிக்கப்பட்டது.

1,700 ஏக்கர் நிலம் மாற்றம்

திட்டத்தின் முதல் கட்டமாக சுமார் 1,700 ஏக்கர் நிலத்தை மாற்றுவதற்கான அரசாணையை தமிழ்நாடு அரசு SIPCOT நிறுவனத்திற்கு வழங்கியுள்ளது.

SIPCOT நிறுவனம் வ.உ.சி. துறைமுக ஆணையத்துடன் இணைந்து திட்டத்துக்குத் தேவையான பொதுவான உள்கட்டமைப்பு வசதிகளை உருவாக்கும் பணியில் ஈடுபட உள்ளது.

திட்டத்தை முன்னெடுக்க உறுதி

செப்டம்பர் 9-ம் தேதி தலைமைச் செயலகத்தில் தொழில்துறை அமைச்சரை ஹூண்டாய் குழுவினர் சந்தித்தனர். அப்போது தூத்துக்குடி கப்பல் கட்டும் தளத் திட்டத்தை முன்னெடுத்துச் செல்வதாக ஹூண்டாய் தரப்பில் உறுதி அளிக்கப்பட்டதாக தமிழ்நாடு அரசு தெரிவித்துள்ளது.

திட்டத்தை செயல்படுத்த மாநில அரசின் முழு ஆதரவும் வழங்கப்படும் என அமைச்சர் உறுதியளித்துள்ளார்.

இதன் தொடர்ச்சியாக, செப்டம்பர் 10-ம் தேதி ஹூண்டாய் குழுவினர் துறைமுகங்கள், கப்பல் போக்குவரத்து மற்றும் நீர்வழிகள் அமைச்சகத்தின் மூத்த அதிகாரிகளை சந்தித்து, திட்டத்தை முன்னெடுப்பதற்கு மத்திய அரசிடம் இருந்து தேவைப்படும் கொள்கை அளவிலான ஆதரவு குறித்து ஆலோசனை நடத்தினர்.

தூத்துக்குடியில் உருவாகும் புதிய தொழில்துறை சூழல்

கப்பல் கட்டும் தளம் அமைப்பதுடன், அதனைச் சுற்றி மிகப்பெரிய கடல்சார் தொழில்துறை சூழலை உருவாக்கவும் தமிழ்நாடு அரசு நடவடிக்கை எடுத்து வருகிறது.

இந்தியாவின் முக்கிய எஃகு உற்பத்தியாளர்களுடன் தொழில்நுட்ப தேவைகள் மற்றும் தர சரிபார்ப்பு தொடர்பான பேச்சுவார்த்தைகளையும் அரசு ஒருங்கிணைத்து வருகிறது.

மேலும், தமிழ்நாடு மாநில திறன் மேம்பாட்டு இயக்கத்துடன் இணைந்து பிரத்யேக திறன் மேம்பாட்டு குழாய் உருவாக்கப்பட்டு வருகிறது. இதில் தொழில்நுட்ப பணியாளர்கள் மட்டுமின்றி நிர்வாக பணியாளர்களையும் உருவாக்குவதற்கான திட்டங்கள் இடம்பெற்றுள்ளன.

தேவைப்பட்டால், பணியாளர்களுக்கு கொரியாவில் பயிற்சி அளித்து பின்னர் தூத்துக்குடி கப்பல் கட்டும் தளத்தில் பணியமர்த்தும் வாய்ப்புகளும் ஆராயப்பட்டு வருகின்றன.

தென் தமிழகத்திற்கு புதிய தொழில் வாய்ப்பு?

தூத்துக்குடியை உலகளாவிய கப்பல் கட்டுமானம் மற்றும் கடல்சார் உற்பத்தி மையமாக உருவாக்கும் நோக்கில் ஹூண்டாய், மத்திய அரசு மற்றும் பிற பங்குதாரர்களுடன் இணைந்து தமிழ்நாடு அரசு செயல்பட்டு வருவதாக தெரிவித்துள்ளது.

இந்தத் திட்டம் செயல்பாட்டுக்கு வரும் பட்சத்தில், தென் தமிழகத்தில் புதிய தொழில்துறை சூழல் உருவாகும் என்றும், முதலீடுகள், தொழில்நுட்பப் பரிமாற்றம், திறமையான வேலைவாய்ப்புகள், உள்ளூர் சப்ளையர் நிறுவனங்களின் வளர்ச்சி மற்றும் உலகளாவிய கப்பல் கட்டுமான மதிப்பு சங்கிலியுடன் தூத்துக்குடி இணையும் வாய்ப்பு உருவாகும் என்றும் அரசு அறிக்கையில் தெரிவிக்கப்பட்டுள்ளது.