இனிமே 3 ஹேஷ்டேக் மட்டுமே…இன்ஸ்டாகிராம் எடுத்த அதிரடி முடிவு!

Instagram பதிவுகளில் 3 HASHTAGகளை மட்டுமே பதிவிட முடியும் என்ற கட்டுப்பாடு விதிக்க மெட்டா நிறுவனம் முடிவு

சென்னை : உலகின் மிகப் பிரபலமான சமூக வலைதளங்களில் ஒன்றான இன்ஸ்டாகிராம், பதிவுகளில் பயன்படுத்தப்படும் ஹேஷ்டேக் (hashtag) எண்ணிக்கையை குறைக்கும் புதிய சோதனை முயற்சியைத் தொடங்கியுள்ளது. மெட்டா நிறுவனம் (இன்ஸ்டாகிராமின் தாய் நிறுவனம்) சில பயனர்களுக்கு மட்டும் 3 ஹேஷ்டேக் மட்டுமே பதிவிட அனுமதிக்கும் கட்டுப்பாட்டை அறிமுகப்படுத்தியுள்ளது. இதற்கு      முன், ஒரு பதிவுக்கு அதிகபட்சம் 30 ஹேஷ்டேக்கள் பயன்படுத்தலாம் என்ற விதி இருந்தது. இந்த மாற்றம், சமூக வலைதளங்களில் உள்ளடக்கம் (content) தேடல் மற்றும் காட்டும் முறையை மாற்றும் என்று நிபுணர்கள் கருதுகின்றனர்.

இந்த சோதனை முயற்சி (A/B testing) சில பயனர்களுக்கு மட்டுமே அமல்படுத்தப்பட்டுள்ளது. ரெடிட் மற்றும் ட்விட்டர் போன்ற தளங்களில் பலர் இதைப் பற்றி புகார் செய்துள்ளனர். ஒரு பதிவுக்கு 4-ஆவது ஹேஷ்டேக் சேர்க்க முயன்றால், “You can only add 3 hashtags to your caption” என்ற எச்சரிக்கை செய்தி தோன்றுகிறது. சிலர் போனில் 3 ஹேஷ்டேக் மட்டுமே அனுமதிக்கிறது என்றும், டெஸ்க்டாப்பில் 30 வரை சேர்க்கலாம் என்றும் கூறுகின்றனர்.

இது இன்ஸ்டாகிராமின் அல்காரிதம் (algorithm) அடிப்படையில் உள்ளடக்கத்தை காட்டும் முறையை மேம்படுத்த, ஹேஷ்டேக் ஸ்பேம் (spam) ஐ குறைக்கும் நோக்கத்தில் செய்யப்படுவதாக தெரிகிறது. இன்ஸ்டாகிராம் தலைவர் ஆடம் மாசெரி ஏற்கனவே ஹேஷ்டேக்கள் உள்ளடக்கம் அடையாளம் காண்பதற்கு மட்டுமே உதவுவதாகவும், அதிகம் பயன்படுத்தினால் அது போட்டியை அதிகரிப்பதாகவும் கூறியிருந்தார்.இந்த மாற்றம் சிறு உள்ளடக்க உருவாக்குநர்கள் (small creators) மற்றும் வணிகப் பக்கங்களுக்கு பெரும் சவாலாக மாறலாம். ஹேஷ்டேக்கள் புதிய ரசிகர்களை ஈர்க்கும் முக்கிய கருவியாக இருந்தன.

30 ஹேஷ்டேக்களில் பிரபலமானவை, நிஷ் (niche) தலைப்புகள், பொதுவானவை என கலந்து பயன்படுத்தி உள்ளடக்கம் அதிகரவைப்பது வழக்கம். இப்போது 3-ஆகக் குறைந்தால், உள்ளடக்கம் குறைந்த ரசிகர்களுக்கு மட்டுமே செல்லலாம். சிலர் “இது ஸ்பேம் குறைக்கும்” என்று ஆதரிக்க, மற்றவர்கள் “சிறு கணக்குகளுக்கு இழப்பு” என்று விமர்சிக்கின்றனர். இன்ஸ்டாகிராம் இதை முழு அளவில் அறிமுகப்படுத்துமா என்பது இன்னும் உறுதியாகவில்லை, ஆனால் சோதனை முடிவுகளைப் பொறுத்து முடிவு எடுக்கப்படும் என எதிர்பார்க்கப்படுகிறது.