தூத்துக்குடி மாவட்டத்தில் 2271.60 மிமீ மழை: ஏரல், ஸ்ரீவைகுண்டம் பகுதிகளுக்கு வெள்ள அபாய எச்சரிக்கை!

தூத்துக்குடி மாவட்டத்தில் கடந்த 24 மணி நேரத்தில் 2271.60 மிமீட்டர் மழை பெய்துள்ளது. அதிகபட்சமாக கோவில்பட்டியில் 364.70 மி.மீ மழை பெய்துள்ளது. 

தென்கிழக்கு வங்கக்கடல் பகுதியில் உருவாகியுள்ள ஆழ்ந்த காற்றழுத்த தாழ்வுப் பகுதியின் காரணமாகத் தமிழ்நாட்டில் பல்வேறு பகுதிகளிலும் கனமழை பெய்து வருகிறது. குறிப்பாகத் தென் மாவட்டங்களில் தொடர்ச்சியாக கனமழை பெய்து வருகிறது. 

இதில், தூத்துக்குடி மாவட்டத்திற்கு ரெட் அலர்ட் எச்சரிக்கை விடுக்கப்பட்டுள்ள நிலையில், மாவட்ட நிர்வாகம் சார்பில் பல்வேறு முன்னெச்சரிக்கை நடவடிக்கைகள் எடுக்கப்பட்டு வருகிறது.  இந்தநிலையில், தூத்துக்குடி மாவட்டத்தில் 12.12.24 காலை 6.30 மணி முதல் 13.12.24 காலை 6.30 மணி வரை கடந்த 24 மணி வரை பெய்த மழை பொழிவு குறித்த அளவு விபரத்தை மாவட்ட நிர்வாகம் வெளியிட்டுள்ளது. அதன்படி,

தூத்துக்குடியில் 59.50 மி.மீ, ஸ்ரீவைகுண்டத்தில் 145.50 மி.மீ, திருச்செந்தூரில் 41.10 மி.மீ, காயல்பட்டிணத்தில் 105.00 மி.மீ, குலசேகரப்பட்டினத்தில் 17.00 மி.மீ, சாத்தான்குளத்தில் 64.60 மி.மீ, கோவில்பட்டியில் 364.70 மி.மீ, கழுகுமலையில் 168.00 மி.மீ, கயத்தாறில் 113.00 மி.மீ, கடம்பூரில் 156.00 மி.மீ, எட்டயபுரத்தில் 174.40 மி.மீ, விளாத்திகுளத்தில் 186.00, காடல்குடியில் 121.00 மி.மீ, வைப்பாரில் 169.00 மி.மீ, சூரங்குடியில் 127.00 மி.மீ, ஒட்டப்பிடாரத்தில் 90.10 மி.மீ, மணியாச்சியில் 76.00 மி.மீ, வேடநத்தத்தில் 51.20 மி.மீ, கீழ அரசரடியில் 42.40 மி.மீ என

மொத்தம் 2271.60 மி.மீ மழையும், சாராசரி மழை பொழிவாக 119.56 மி.மீ மழையும் பொழிந்துள்ளதாக தூத்துக்குடி மாவட்ட நிர்வாகம் தெரிவித்துள்ளது. இதில் அதிக பட்சமாக கோவில்பட்டியில் 364.70 மி.மீ மழையும், குறைந்த பட்சமாக குலசேகரப்பட்டினத்தில் 17.00 மி.மீ மழையும் பொழிந்துள்ளது குறிப்பிட தக்கது.

தாமிரபரணியில் நீர்வரத்து அதிகரிப்பு: ஏரல், ஸ்ரீவைகுண்டம் பகுதிகளுக்கு வெள்ள அபாய எச்சரிக்கை

வங்கக்கடலில் நிலவிய ஆழ்ந்த காற்றழுத்த தாழ்வு பகுதி காரணமாக தமிழகத்தில் பல்வேறு மாவட்டங்களில் கனமழை பெய்யும் என்று வானிலை ஆய்வு மையம் எச்சரித்தது. இதன்படி நெல்லை, தூத்துக்குடி, தென்காசியில் நேற்று இடைவிடாது கனமழை கொட்டித்தீர்த்தது. நீர்வரத்து அதிகரித்ததால் தாமிரபரணி ஆற்றில் குளிக்க தடை விதிக்கப்பட்டது.

இந்நிலையில் தாமிரபரணியில் வெள்ளம் அதிகரிப்பதால் வெள்ள அபாய எச்சரிக்கை விடுக்கப்பட்டுள்ளது. கரையோர மக்கள் வெளியேறுமாறு அதிகாரிகள் அறிவுறுத்தி வருகின்றனர். தூத்துக்குடி மாவட்டத்தில் ஸ்ரீவைகுண்டம், ஏரல் தாலுக்காக்களுக்கு எச்சரிக்கை விடுக்கப்பட்டுள்ளது. தாமிரபரணி கரையோர மக்கள் பாதுகாப்பாக இருக்க மாவட்ட ஆட்சியர் அறிவுறுத்தி உள்ளார்.