கோரம்பள்ளம் குளத்தில் 7 மதகுகள் திறப்பு: உப்பாற்று ஓடை கரையோர பகுதிகளில் வெள்ள அபாயம்..!

கோரம்பள்ளம் குளத்தில் 7 மதகுகள் திறக்கப்பட்டதால், உப்பாற்று ஓடை கரையோர பகுதிகளில் வெள்ள அபாயம் ஏற்பட்டுள்ளதால், மாவட்ட ஆட்சியர் க.இளம்பகவத் உத்தரவின் பேரில், கோரம்பள்ளம் குளத்தை பொதுப்பணித்துறை அதிகாரிகள் தொடர்ந்து கண்காணித்து வருகின்றனர். 

வடகிழக்கு பருவமழை தொடர்ந்து பெய்து வரும் நிலையில், தூத்துக்குடி மாவட்டம், ஓட்டப்பிடாரம் சுற்று வட்டார பகுதியிலுள்ள குளங்கள் வேகமாக நீர் நிரம்பி வருகின்றன. இந்நிலையில் கழுகுமலை, கயத்தாறு, கடம்பூர், மணியாச்சி, ஓட்டப்பிடாரம் பகுதிகளில் பெய்து வரும் கனமழை, காட்டாற்று வெள்ளமாக கொம்பாடி ஓடை வழியே கோரம்பள்ளம் குளத்தை நோக்கி பாய்ந்து வருகிறது.

இதனையடுத்து, 24 மதகுகள் கொண்ட இந்த குளத்தின் பாதுகாப்பு கருதி, நேற்று முன்தினம் (சனிக்கிழமை) நள்ளிரவில் ஒன்றன்பின் ஒன்றாக 4 மதகுகள் திறக்கப்பட்டு, 3,000 கனஅடி தண்ணீர் வெளியேற்றப்பட்டு வந்தன. பின்னர் நேற்று அதிகாலை மழை நின்ற நிலையில், நீர்வரத்து குறைந்ததால், 3 மதகுகள் அடைக்கப்பட்டு, ஒரு மதகு மூலம் 500 கன அடி தண்ணீர் வெளியேற்றப்பட்டு வந்தது.

இந்நிலையில், நேற்று (ஞாயிற்றுக்கிழமை) காலை மீண்டும் தொடங்கிய மழை தொடர்ந்து பெய்ததால், கோரம்பள்ளம் குளத்துக்கு நீர்வரத்து மேலும் அதிகரித்தது. இதனால், கோரம்பள்ளம் குளத்தில் கூடுதலாக மதகுகள் திறக்கப்பட்டன. நேற்று இரவு 3 மதகுகள் திறக்கப்பட்டதை தொடர்ந்து இன்று காலை நிலவரப்படி 7 மதகுகள் மூலம் 7,000 கனஅடி தண்ணீர் வெளியேற்றப்பட்டு வருகிறது. இதன் காரணமாக, அத்திமரப்பட்டி - காலாங்கரை இடையே உப்பாற்று ஓடையில் புதிதாக கட்டப்பட்டு வரும் உயர்மட்ட பாலத்தை தொடும் அளவுக்கு தண்ணீர் சென்றது.

கனமழையால் கோரம்பள்ளம், காலாங்கரை, பெரியநாயகிபுரம், வீரநாயக்கன்தட்டு, அத்திமரப்பட்டி, முத்தையாபுரம், முள்ளக்காடு, குலையன்கரிசல் பகுதிகளில் ஆயிரக்கணக்கான ஏக்கரில் வாழைகள் நீரில் மூழ்கி கிடக்கின்றன. கனமழையின் வீசிய திடீர் சூறைக்காற்றால், நேற்று மாலை முத்தையாபுரம் தோப்பு தெருவில் உள்ள புளியமரம் ஒன்று விழுந்ததால் முத்தையாபுரம், அத்திமரப்பட்டி முள்ளக்காடு பகுதிகளில் நேற்று மாலை 6 முதல் இரவு 11 மணி வரை மின்தடை ஏற்பட்டது.

உப்பாற்று ஓடை கரையோர பகுதிகளில் வெள்ள அபாயம் ஏற்பட்டுள்ளதால், மாவட்ட ஆட்சியர் க.இளம்பகவத் உத்தரவின் பேரில், கோரம்பள்ளம் குளத்தை பொதுப்பணித்துறை அதிகாரிகள் தொடர்ந்து கண்காணித்து வருகின்றனர். மேலும் கலெக்டரின் உத்தரவுப்படி, கொம்பாடி ஓடையில் வரும் காற்றாற்று வெள்ளத்தை புதுக்கோட்டை பாலத்தில் இருந்தும், தாமிரபரணி ஆற்று நீர்வரத்தை முறப்பநாடு பாலத்தில் இருந்தும் அதிகாரிகள் கண்காணித்து வருகின்றனர்.