தூத்துக்குடியில் நள்ளிரவில் பயங்கரம்... வாலிபர் குத்திக் கொலை: போலீஸ் விசாரணை

தூத்துக்குடியில் வாலிபரை கத்தியால் குத்திக் கொலை செய்த மர்ம நபரை போலீசார் தேடி வருகின்றனர். 

தூத்துக்குடி, மையவாடி அருகே டீக்கடை முன்பு சுமார் 35 வயது மதிக்கத்தக்க வாலிபர் கழுத்தில் குத்தப்பட்டு கொலை செய்யப்பட்டு கிடந்தார். இது குறித்து தகவல் அறிந்த தெற்கு காவல் நிலைய இன்ஸ்பெக்டர் ராஜாராம், சப் இன்ஸ்பெக்டர்கள் கெங்கைநாத பாண்டியன், சிவக்குமார் மற்றும் போலீசார் சம்பவ இடத்திற்கு விரைந்து சென்று சடலத்தை கைப்பற்றி விசாரணை நடத்தினார்கள்.

போலீசாரின் முதல் கட்ட விசாரணையில் 

 நேற்று இரவு அந்த வாலிபர் படுத்து தூங்கும் இடத்தில் வேறு ஒரு வாலிபர் படுத்து தூங்கினாராம். இதனால் இருவருக்கும் இடையே ஏற்பட்ட தகராறில் மர்ம நபர் கூர்மையான ஆயுதத்தால் குத்தி கொலை செய்துவிட்டு தப்பி ஓடி விட்டதாக விசாரணையில் தெரியவந்தது.

கொலை செய்யபட்ட வாலிபரின் சட்டை பையில் இருந்த ஆதார் கார்டை வைத்து போலீசார் விசாரணை மேற்கொண்டனர். அதில் அவர் முத்தையாபுரம் பகுதியை சேர்ந்தவராக இருக்கலாம் என்ற அடிப்படையில் போலீசார் விசாரணை மேற்கொண்டனர், ஆனால் வாலிபர் சட்டை பையில் இருந்த ஆதார் கார்டு முகவரிக்கும் அவருக்கும் தொடர்பில்லை என தெரியவந்துள்ளது. 

இது தொடர்பாக தெற்கு காவல் நிலைய போலீசார் வழக்குப் பதிந்து சிசிடிவி காட்சிகளின் அடிப்படையில் கொலையாளியை தேடி வருகின்றனர். சம்பவ இடத்தை டவுன் டிஎஸ்பி சத்யராஜ் பார்வையிட்டார்.