தோஷம் கழிப்பதாக கூறி பெண்ணிடம் பணம் அபேஸ்: மர்ம ஆசாமிகளுக்கு போலீஸ் வலைவீச்சு
சாத்தான்குளத்தில் தோஷம் கழிப்பதாக கூறி பெண்ணிடம் பணம் அபேஸ் செய்த மர்மஆசாமிகளை போலீசார் தேடிவருகின்றனர்.
சாத்தான்குளத்தில் தோஷம் கழிப்பதாக கூறி பெண்ணிடம் பணம் அபேஸ் செய்த மர்மஆசாமிகளை போலீசார் தேடிவருகின்றனர்.
தூத்துக்குடி மாவட்டம் சாத்தான்குளம் பகுதியில் உள்ள ஒருவர் மின்வாரியத்தில் ஊழியராக பணியாற்றி வருகிறார். இவர் நேற்று முன்தினம் காலையில் வேலைக்கு சென்றுவிட்டார். இதனால் அவரது மனைவி மட்டும் வீட்டில் தனியாக இருந்தார். அப்போது, அங்கு ஒரு மோட்டார் சைக்கிளில் 3பேர் சாமியார் வேடம் அணிந்து வந்தனர். அவர்கள், வீட்டில் தோஷம் இருப்பதாகவும், இதை நீக்க வேண்டும் என்றால் ரூ.9 ஆயிரம் தர வேண்டும் என்றும் தெரிவித்தனர்.
இதனால் அந்த பெண் தனது கணவரிடம் கேட்டுக் கொண்டு தருவதாக கூறினார். ஆனால் 3 பேரும், அவரிடம் நைசாக பேசி ஏமாற்றி ரூ.9 ஆயிரத்தை அபேஸ் செய்து சென்றனர். இதையடுத்து உடனடியாக அவர் தனது கணவரிடம் தெரிவித்தார். இதனால் அதிர்ச்சி அடைந்த அவர் பல்வேறு இடங்களில் 3 பேரையும் தேடினார். ஆனால் கண்டுபிடிக்க முடியவில்லை.
இதுகுறித்து உடனடியாக சாத்தான்குளம் போலீசில் புகார் செய்யப்பட்டது. போலீசார் சம்பவ இடத்திற்கு சென்று விசாரணை மேற்கொண்டனர். மேலும் அங்குள்ள கண்காணிப்பு கேமராக்களை ஆய்வு செய்தனர். அதில் ஒரு மோட்டார் சைக்கிளில் 3 பேர் சாமியார் போல் வேடம் அணிந்து செல்லும் காட்சிகள் பதிவாகி இருந்தது. இதுதொடர்பாக போலீசார் விசாரணை நடத்தி மர்ம ஆசாமிகள் 3 பேரையும் தேடிவருகிறார்கள்.
