தூத்துக்குடியில் விடிய விடிய அங்கன்வாடி ஊழியர்கள் காத்திருப்பு போராட்டம்: இன்று அமைச்சருடன் பேச்சுவார்த்தை!
தூத்துக்குடியில் பல்வேறு கோரிக்கைகளை வலியுறுத்தி அங்கன்வாடி ஊழியர்கள் விடிய விடிய காத்திருப்பு போராட்டம் நடைபெற்றது. மேலும் இன்று சமூக நலத்துறை அமைச்சர் கீதா ஜீவன் தலைமையில் பேச்சுவார்த்தை நடைபெறவுள்ளது.
தூத்துக்குடியில் பல்வேறு கோரிக்கைகளை வலியுறுத்தி அங்கன்வாடி ஊழியர்கள் விடிய விடிய காத்திருப்பு போராட்டம் நடைபெற்றது. மேலும் இன்று சமூக நலத்துறை அமைச்சர் கீதா ஜீவன் தலைமையில் பேச்சுவார்த்தை நடைபெறவுள்ளது.
10 குழந்தைகளுக்கு குறைவாக இருக்கும் பிரதான அங்கன்வாடி மையங்களை மினி மையங்களாக்குவதையும், 5 குழந்தைகளுக்கு குறைவாக இருக்கும் மையங்களை பிரதான மையங்களோடு இணைக்கும் திட்டத்தையும் கைவிட வேண்டும். 2 அல்லது மூன்று 3 மையங்களுக்கு கூடுதல் பொறுப்பு வழங்கி வேலை பளுவை அதிகரிப்பதை நிறுத்த வேண்டும். காலிப்பணியிடங்களை நிரப்ப வேண்டும் என்பன உள்ளிட்ட கோரிக்கைகளை வலியுறுத்தி தமிழ்நாடு அங்கன்வாடி ஊழியர் மற்றும் உதவியாளர் சங்கம் சார்பில் மாவட்ட ஆட்சியர் அலுவலகம் முன்பு நேற்று மாலை காத்திருப்பு போராட்டம் நடந்தது.
போராட்டத்துக்கு மாவட்டத் தலைவர் த.ஜெயராணி தலைமை தாங்கினார். மாவட்ட செயலாளர் எம்.சந்திரா கோரிக்கைகளை வலியுறுத்தி பேசினார். சி.ஐ.டி.யு மாவட்ட தலைவர் இரா.பேச்சிமுத்து, மாவட்ட குழு உறுப்பினர் இல.ராமமூர்த்தி, ரவி தாகூர் ஆகியோர் பேசினர்.
கோரிக்கைகளை நிறைவேற்றும் வரை நாங்கள் இந்த காத்திருப்பு போராட்டத்தை கைவிடமாட்டோம். இரவு பகலாக எங்கள் போராட்டம் தொடரும் என்று போராட்டத்தில் கலந்து கொண்டவர்கள் தெரிவித்தனர். இந்த போராட்டத்தில் மாவட்டம் முழுவதிலும் இருந்து சுமார் 500-க்கும் மேற்பட்டவர்கள் கலந்து கொண்டனர்.
தொடர்ந்து ஆட்சியர் அலுவலகத்தில் விடிய விடிய காத்திருக்கும் போராட்டத்தில் ஈடுபட்டனர்.
