“ரசம் கேட்டா டம்ளரில் வெந்நீர் தாராங்க!” – திருச்செந்தூர் பிரபல மெஸ் மீது பக்தர்கள் பரபரப்பு குற்றச்சாட்டு; அதிகாரிகள் அதிரடி ஆய்வு

திருச்செந்தூர்: முருகன் கோயிலுக்கு சுவாமி தரிசனம் செய்ய வரும் பக்தர்கள் மத்தியில் பிரபலமாக பேசப்படும் உணவகம் ஒன்றில் உணவின் தரம் குறித்து தாய்–மகள் வெளியிட்ட வீடியோ சமூக வலைதளங்களில் பெரும் பரபரப்பை ஏற்படுத்தியுள்ளது. இதையடுத்து உணவு பாதுகாப்புத்துறை அதிகாரிகள் சம்பந்தப்பட்ட உணவகத்தில் ஆய்வு மேற்கொண்டுள்ளனர்.

சமூக வலைதளத்தில் வைரலான வீடியோ

திருச்செந்தூருக்கு சுவாமி தரிசனம் செய்ய வந்த தாய்–மகள் உள்ளிட்ட 5 பேர், கோயிலில் தரிசனம் முடித்த பின்னர் மதிய உணவுக்காக மணி அய்யர் மெஸ் சென்றதாக வீடியோவில் தெரிவித்துள்ளனர்.

இந்த உணவகத்தை பல்வேறு சமூக வலைதள கிரியேட்டர்கள் சிறப்பாக பரிந்துரைத்திருந்ததாகவும், அதனை நம்பி அங்கு சென்று உணவு சாப்பிட்டதாகவும் அவர்கள் கூறியுள்ளனர்.

₹250 ஸ்பெஷல் மீல்ஸ்... உணவு தரம் குறித்து புகார்

அங்கு ₹250-க்கு ஸ்பெஷல் மீல்ஸ் வாங்கியதாகவும், ஆனால் உணவின் தரம் தங்களுக்கு திருப்திகரமாக இல்லை என்றும் அவர்கள் குற்றம்சாட்டியுள்ளனர்.

சப்பாத்தி சரியாக வேகவில்லை என்றும், சாதமும் முழுமையாக வேகவில்லை என்றும், குழம்பு உள்ளிட்ட உணவுகள் எதிர்பார்த்த தரத்தில் இல்லை என்றும் வீடியோவில் தெரிவிக்கப்பட்டுள்ளது.

“தயிர் சாதத்திலும் வெங்காயம்...”

தயிர் சாதம் குறித்தும் அவர்கள் அதிருப்தி தெரிவித்துள்ளனர். உதிரி உதிரியாக இருந்த சாதத்தில் தயிர் கலந்தது போல் இருந்ததாகவும், தயிர் சாதத்தில் தாளிப்பு இல்லை என்றும் கூறியுள்ளனர்.

மேலும், தயிரில் வெங்காயத் துண்டுகள் இருந்ததாகவும் வீடியோவில் அவர்கள் தெரிவித்துள்ளனர்.

“ரசம் கேட்டா டம்ளரில் வெந்நீர்!”

இந்த வீடியோவில் அதிகம் பேசப்பட்ட குற்றச்சாட்டு ரசம் தொடர்பானதாகும்.

“ரசம் கேட்டபோது டம்ளரில் வெந்நீர் மாதிரி கொடுத்தார்கள்; உண்மையிலேயே அது வெந்நீராகத்தான் இருந்தது” என அவர்கள் தெரிவித்துள்ளனர்.

மேலும், உணவை சாப்பிட முடியாமல் தாங்கள் உணவகத்தை விட்டு வெளியேறியதாகவும், சுமார் ₹650 வரை பணம் செலுத்தியதாகவும் அவர்கள் கூறியுள்ளனர்.

“ஹைப் கிரியேட் பண்ணாதீங்க”

சமூக வலைதளங்களில் ஒரு உணவகத்தை பிரபலப்படுத்துவதற்கு முன்பு அதன் உண்மையான தரத்தை கருத்தில் கொள்ள வேண்டும் என்றும், வெளியூரிலிருந்து வரும் பக்தர்கள் சமூக வலைதள பரிந்துரைகளை நம்பி சென்று ஏமாற்றமடையக் கூடாது என்றும் அவர்கள் கேட்டுக்கொண்டுள்ளனர்.

“ஒரு டிரெண்ட், ஒரு ஹைப் உருவாக்கி தவறான விஷயத்தை தயவு செய்து ப்ரமோட் செய்யாதீர்கள்” என்றும் அந்த வீடியோவில் வேண்டுகோள் விடுக்கப்பட்டுள்ளது.

மற்றொரு ஹோட்டலையும் குறிப்பிட்ட தாய்–மகள்

அதே பகுதியில் உள்ள மற்ற உணவகங்களைப் பற்றியும் அவர்கள் குறிப்பிட்டுள்ளனர். குறிப்பாக, காலையில் வேறு ஹோட்டலில் சாப்பிட்ட உணவு நன்றாகவும், திருப்திகரமாகவும் இருந்ததாக அவர்கள் தெரிவித்துள்ளனர்.

உணவு பாதுகாப்புத்துறை அதிகாரிகள் ஆய்வு

இந்த நிலையில், சமூக வலைதளங்களில் பரவி வரும் வீடியோ மற்றும் அதில் கூறப்பட்டுள்ள புகார்கள் தொடர்பாக உணவு பாதுகாப்புத்துறை அதிகாரிகள் சம்பந்தப்பட்ட உணவகத்தில் ஆய்வு மேற்கொண்டுள்ளனர்.

உணவுப் பொருட்களின் தரம், தயாரிப்பு மற்றும் சேமிப்பு முறைகள், சுகாதார நிலை உள்ளிட்ட அம்சங்கள் தொடர்பாக அதிகாரிகள் ஆய்வு செய்துள்ளதாக தெரிவிக்கப்பட்டுள்ளது.

திருச்செந்தூர் முருகன் கோயிலுக்கு தினமும் ஏராளமான பக்தர்கள் வந்து செல்லும் நிலையில், பக்தர்களுக்கு வழங்கப்படும் உணவின் தரம் மற்றும் பாதுகாப்பை உறுதி செய்ய அதிகாரிகள் உரிய நடவடிக்கை எடுக்க வேண்டும் என்ற கோரிக்கையும் எழுந்துள்ளது.

வைரலாகும் வீடியோவில் கூறப்பட்டுள்ள குற்றச்சாட்டுகளின் முழுமையான உண்மை, அதிகாரிகளின் ஆய்வு மற்றும் சம்பந்தப்பட்ட உணவகத்தின் விளக்கம் வெளியாகிய பின்னரே உறுதி செய்யப்படும் என்பது குறிப்பிடத்தக்கது.