தூத்துக்குடி மாநகர பகுதிகளில் திரியும் கால்நடைகள் பறிமுதல் செய்யப்படும் - மாநகராட்சி ஆணையர் எச்சரிக்கை!!
தூத்துக்குடி மாநகர பகுதிகளில் திரியும் கால்நடைகள் அரசால் அங்கீகரிக்கப்பட்ட கோசாலையில் ஒப்படைக்கப்படும் என மாநகராட்சி ஆணையர் தினேஷ் குமார் தெரிவித்துள்ளார்.
தூத்துக்குடி மாநகர பகுதிகளில் திரியும் கால்நடைகள் அரசால் அங்கீகரிக்கப்பட்ட கோசாலையில் ஒப்படைக்கப்படும் என மாநகராட்சி ஆணையர் தினேஷ் குமார் தெரிவித்துள்ளார்.
இதுகுறித்து அவர் வெளியிட்ட செய்திக்குறிப்பில், "தூத்துக்குடி மாநகராட்சிக்கு உட்பட்ட பகுதிகளில் பொதுமக்களுக்கு இடையூறாகவும் போக்குவரத்திற்கு அபாயத்தை உண்டாக்கும் வகையிலும் சுற்றித் திரியும் கால்நடைகளை அந்தந்த உரிமையாளர்கள் தங்களது சொந்த பொறுப்பில் பாதுகாத்து பராமரிக்குமாறு பல்வேறு செய்திகள் வாயிலாக தெரிவித்தும், தொடர்ச்சியாக கால்நடைகள் போக்குவரத்து மிகுந்த பகுதிகளில் அலைந்து திரிவதால் அடிக்கடி விபத்துக்கள் ஏற்படுவதால் பொதுமக்கள் பெரிதும் அவதிப்படுகின்றனர்.
எனவே இதனை ஒழுங்குபடுத்தும் விதமாக அவ்வப்போது மாநகராட்சி சார்பில் கால்நடைகளை பிடித்து உரிமையாளர்களுக்கு அபராதம் விதிப்பதுடன் கோசாலையில் பராமரிக்க ஏற்பாடு செய்யப்பட்டு வருகிறது. இந்நிலையில், மாநகரத்தின் பிரதான பகுதிகளில் அலைந்து திரியும் கால்நடைகளால் பொதுமக்களின் உயிருக்கு அச்சுறுத்தல் ஏற்படுத்தும் விதமாக பல்வேறு நிகழ்வுகள் நடைபெறுவதால் பல்வேறு தரப்பினரிடமிருந்தும் புகார்கள் வந்த வண்ணம் உள்ளது.
எனவே, கால்நடை வளர்ப்போர் தங்களது சொந்த பொறுப்பில் குறிப்பிட்ட இடத்தில் அடைத்து கால்நடைகளை பராமரிக்குமாறு தெரிவிக்கப்படுகிறது. தவறும் நிலையில், மாநகர பகுதிகளில் அலைந்து திரியும் கால்நடைகள் மாநகராட்சியால் பிடிக்கப்பட்டு அரசால் அங்கீகரிக்கப்பட்ட கோசாலையில் ஒப்படைக்கப்படும். மேலும், இனி வரும்காலங்களில் கோசாலையில் ஒப்படைக்கப்படும் கால்நடைகள் திரும்ப உரிமையாளரிடம் ஒப்படைக்க மாட்டாது எனவும் மாநகராட்சி ஆணையர் ச.தினேஷ்குமார் தெரிவித்துள்ளார்.
