28 பயணிகளுடன் சென்ற அரசு பேருந்து பள்ளத்தில் பாய்ந்த அதிர்ச்சி! – ஓட்டுநரின் ஒரு நொடி சாமர்த்தியத்தால் தவிர்க்கப்பட்ட பெரும் உயிரிழப்பு!

தூத்துக்குடி மாவட்டம் எட்டயபுரம் அருகே தூத்துக்குடி–மதுரை தேசிய நெடுஞ்சாலையில் அரசு பேருந்தும் வேனும் தொடர்புடைய விபத்தில், அரசு பேருந்து கட்டுப்பாட்டை இழந்து சாலையோர பள்ளத்தில் பாய்ந்ததால் பரபரப்பு ஏற்பட்டது. இந்த விபத்தில் 10 பேர் காயமடைந்த நிலையில், ஓட்டுநரின் துரிதமான செயல்பாட்டால் பெரும் உயிர்ச்சேதம் தவிர்க்கப்பட்டதாக கூறப்படுகிறது.

திருச்செந்தூரில் இருந்து 28 பயணிகளுடன் குமுளி நோக்கி அரசு பேருந்து சென்று கொண்டிருந்தது. எட்டயபுரம் அருகே வந்தபோது, விளாத்திகுளத்தில் இருந்து எட்டயபுரம் நோக்கி வந்த வேன் ஒன்று திடீரென குறுக்கே சாலையைக் கடக்க முயன்றதாக கூறப்படுகிறது.

இதைக் கவனித்த அரசு பேருந்து ஓட்டுநர் தெய்வநாயகம், நேரடி மோதலைத் தவிர்க்க பேருந்தை உடனடியாக திருப்ப முயன்றார். அப்போது வேனின் முன்பகுதி பேருந்தில் உரசியதால், பேருந்து கட்டுப்பாட்டை இழந்து சாலையோர நீரோடை தடுப்புச் சுவரில் ஏறி அருகிலிருந்த பள்ளத்தில் பாய்ந்தது.

விபத்தில் வேனின் முன்பக்கக் கண்ணாடி உடைந்து சேதமடைந்தது. மேலும், பேருந்து ஓட்டுநர் தெய்வநாயகம், பேருந்தில் பயணம் செய்த 6 பேர் மற்றும் வேனில் இருந்த 3 பேர் என மொத்தம் 10 பேர் காயமடைந்தனர்.

சம்பவம் குறித்து தகவல் அறிந்த காவல்துறையினர் மற்றும் மீட்புப் பணியாளர்கள் விரைந்து வந்து காயமடைந்தவர்களை மீட்டு எட்டயபுரம் அரசு மருத்துவமனை மற்றும் அருகிலுள்ள தனியார் மருத்துவமனைகளில் சிகிச்சைக்காக அனுப்பி வைத்தனர்.

வேன் மீது பேருந்து நேரடியாக மோதியிருந்தால் பெரும் உயிரிழப்பு ஏற்பட்டிருக்க வாய்ப்பு இருந்ததாக கூறப்படுகிறது. ஓட்டுநர் தெய்வநாயகத்தின் உடனடி சாமர்த்தியமான நடவடிக்கையால் மிகப்பெரிய விபத்து தவிர்க்கப்பட்டதாக அப்பகுதி மக்கள் தெரிவித்தனர்.

இந்த சம்பவம் குறித்து எட்டயபுரம் காவல்துறையினர் வழக்குப் பதிவு செய்து தீவிர விசாரணை மேற்கொண்டு வருகின்றனர்.