மாமனாரை அரிவாளால் வெட்டிக் கொலை செய்த மருமகன்! தூத்துக்குடியில் பயங்கரம் – 6 பேர் கைது

தூத்துக்குடி முத்தையாபுரத்தில் குடும்பத் தகராறு காரணமாக மனைவி தந்தை வீட்டில் வசித்து வந்த நிலையில், அவரைத் திரும்ப அழைத்துச் செல்ல முடியாத ஆத்திரத்தில் மாமனாரை அரிவாளால் சரமாரியாக வெட்டிக் கொலை செய்ததாகக் கூறப்படும் மருமகன் உள்ளிட்ட 6 பேரை போலீசார் கைது செய்துள்ளனர்.

தூத்துக்குடி முத்தையாபுரம் வேலாயுத நகர் 2-ஆவது தெருவைச் சேர்ந்தவர் சங்கிலி மகன் முனியசாமி (45). ஆட்டோ ஓட்டுநரான இவரது மகள் வைஷ்ணவிக்கும், மதுரை அவனியாபுரத்தைச் சேர்ந்த முருகன் (29) என்பவருக்கும் கடந்த 6 ஆண்டுகளுக்கு முன்பு திருமணம் நடைபெற்றது.

இந்நிலையில், கணவன்-மனைவிக்கு இடையே ஏற்பட்ட குடும்பத் தகராறு காரணமாக வைஷ்ணவி கடந்த 2 மாதங்களாக தனது தந்தை முனியசாமியின் வீட்டில் வசித்து வந்ததாகக் கூறப்படுகிறது.

மனைவி குடும்பம் நடத்தத் திரும்பி வராததற்கு தனது மாமனார் முனியசாமியே காரணம் என முருகன் கருதியதாகத் தெரிகிறது.

⚔️ நண்பர்களுடன் வந்து தாக்குதல்

கடந்த திங்கள்கிழமை மதுரையிலிருந்து தனது நண்பர்களுடன் தூத்துக்குடிக்கு வந்த முருகன், மாமனார் முனியசாமியிடம் தகராறில் ஈடுபட்டுள்ளார். அப்போது இருதரப்புக்கும் இடையே ஏற்பட்ட வாக்குவாதம் முற்றியதாக கூறப்படுகிறது.

இதையடுத்து முருகன் மற்றும் அவருடன் வந்தவர்கள் அரிவாளால் முனியசாமியை சரமாரியாக வெட்டிவிட்டு அங்கிருந்து தப்பிச் சென்றதாக போலீசார் தெரிவித்துள்ளனர்.

பலத்த காயமடைந்த முனியசாமி உடனடியாக தூத்துக்குடி அரசு மருத்துவமனையில் அனுமதிக்கப்பட்டார். பின்னர் மேல் சிகிச்சைக்காக திருநெல்வேலி அரசு மருத்துவக் கல்லூரி மருத்துவமனைக்கு கொண்டு செல்லப்பட்டார்.

அங்கு தீவிர சிகிச்சை அளிக்கப்பட்டு வந்த நிலையில், சிகிச்சை பலனின்றி முனியசாமி உயிரிழந்தார்.

???? தலைமறைவான 6 பேர் கைது

இந்த சம்பவம் குறித்து முத்தையாபுரம் காவல் நிலைய போலீசார் வழக்குப் பதிவு செய்து விசாரணை மேற்கொண்டனர்.

தொடர்ந்து தலைமறைவாக இருந்த மருமகன் முருகன் மற்றும் அவருக்கு உதவியதாகக் கூறப்படும் மதுரை வளையங்குளத்தைச் சேர்ந்த நல்லமருது மகன் நல்லு முருகன் (24), ராமநாதபுரம் மாவட்டம் சாயல்குடி எஸ்.கீரந்தையைச் சேர்ந்த குணசேகரன் மகன் திருமுருகன் (23), மதுரை மேல அனுப்பானடி வீடமைப்பு வாரியக் குடியிருப்பைச் சேர்ந்த முருகவேல் மகன் தீனதயாளன் (22), மதுரை சிந்தாமணி தங்க நாடார் காம்பவுண்டைச் சேர்ந்த சந்திரசேகர் மகன் பெருமாள் என்ற படையப்பா (26) மற்றும் மதுரை சமணநத்தம் மேலத் தெருவைச் சேர்ந்த மணிகண்டன் மகன் அரவிந்த் (25) ஆகிய 6 பேரை போலீசார் கைது செய்துள்ளனர்.

கைது செய்யப்பட்டவர்களிடம் போலீசார் தொடர்ந்து விசாரணை நடத்தி வருகின்றனர். குடும்பத் தகராறு காரணமாக நடந்த இந்த கொலைச் சம்பவம் முத்தையாபுரம் பகுதியில் பெரும் அதிர்ச்சியை ஏற்படுத்தியுள்ளது.