பைக் விபத்தில் கப்பல் மாலுமிகள் 2பேர் பலி!

ஆத்தூர் அருகே மோட்டார் பைக்குகள் நேருக்கு நேர் மோதிய விபத்தில் கப்பல் மாலுமிகள் 2 பேர் பரிதாபமாக உயிரிழந்தனர்.

தூத்துக்குடி மாவட்டம் ஆத்தூர் அருகே உள்ள புன்னக்காயல் தெற்கு தெருவை சேர்ந்தவர் லசிங்டன் (32). இவரது நண்பர் அதே தெருவை சேர்ந்த வசந்தன் (35). இவர்கள் 2 பேரும் நேற்று இரவில் புன்னக்காயலில் இருந்து ஆத்தூருக்கு மோட்டார் சைக்கிளில் புறப்பட்டனர். இதேபோல் அதே தெற்கு தெருவை சேர்ந்த அலெக்சாண்டர் (35), புன்னக்காயல் நூறு வீடு பகுதியைச் சேர்ந்த ராஜன் (51) ஆகியோர் ஆத்தூரில் இருந்து புன்னக்காயல் நோக்கி மற்றொரு மோட்டார் சைக்கிளில்வந்து கொண்டு இருந்தனர்.

2 மோட்டார் சைக்கிள்களும் புன்னக்காயல் பாலம் பகுதியில் வந்த போது எதிர்பாராதவிதமாக நேருக்கு நேர் மோதிக் கொண்டன. இதில் அலெக்சாண்டர், லசிங்டன் ஆகியோர் சம்பவ இடத்திலேயே பரிதாபமாக உயிரிழந்தனர். வசந்தன், ராஜன் ஆகியோர் பலத்த காயம் அடைந்தனர். இதுகுறித்து தகவல் அறிந்த ஆத்தூர் போலீசார் சம்பவ இடத்திற்கு விரைந்து சென்றனர். படுகாயம் அடைந்த வசந்தன், ராஜன் ஆகியோரை மீட்டு சிகிச்சைக்காக ஆத்தூரில் உள்ள தனியார் மருத்துவமனைக்கு அனுப்பி வைத்தனர். 

விபத்தில் உயிரிழந்த அலெக்சாண்டர், லசிங்டன் ஆகியோர் உடலை கைப்பற்றி தூத்துக்குடி அரசு மருத்துவமனைக்கு அனுப்பி வைத்தனர். இவர்கள் 2 பேரும் கப்பல் மாலுமிகள் ஆவர். இந்த சம்பவம் குறித்து போலீசார் வழக்குப்பதிவு செய்து விசாரணை நடத்தி வருகிறார்கள். பைக் விபத்தில் 2 கப்பல் மாலுமிகள் பலியான சம்பவம் அந்த பகுதியில் சோகத்தை ஏற்படுத்தி உள்ளது.