தூத்துக்குடியில் ஆட்டோ டிரைவரை அரிவாளால் தாக்கிய ஆட்டோ டிரைவர் கைது!
ஆட்டோ ஓட்டுநரை அரிவாளால் தாக்கி கொலை மிரட்டல் விடுத்த மற்றொரு ஆட்டோ ஓட்டுநர் கைது.
ஆட்டோ ஓட்டுநரை அரிவாளால் தாக்கி கொலை மிரட்டல் விடுத்த மற்றொரு ஆட்டோ ஓட்டுநர் கைது.
தூத்துக்குடி வடக்குவனியன்விளை பகுதியைச் சேர்ந்த வெற்றிவேல் மகன் சுந்தர் (51) என்பவர் தூத்துக்குடி வடபாகம் காவல் நிலைய எல்லைக்குட்பட்ட பண்டுகரைசாலை எஸ்.எஸ். பிள்ளை மார்க்கெட் பகுதியில் உள்ள ஆட்டோ ஸ்டாண்டில் ஆட்டோ ஓட்டி தொழில் செய்து வருகிறார். அதே ஆட்டோ ஸ்டாண்டில் தூத்துக்குடி தாளமுத்துநகர் சமர்வியாஸ் நகரைச் சேர்ந்த தங்கபாண்டி மகன் விஸ்வநாதன் (42) என்பவரும் ஆட்டோ ஒட்டி வருகிறார். இதனையடுத்து சுந்தருக்கும் விசுவநாதனுக்கும் சவாரி எடுப்பதில் பிரச்சனை இருந்து வந்துள்ளது.
இந்நிலையில் கடந்த 25.03.2023 அன்று மேற்படி ஆட்டோ ஸ்டாண்ட் அருகில் வைத்து விஸ்வநாதன் சுந்தரிடம் தகராறு செய்து தவறாக பேசி அரிவாளால் தாக்கி கொலை மிரட்டல் விடுத்துள்ளார். இதுகுறித்து தகவலறிந்து சம்பவ இடத்திற்கு வந்த சுந்தரின் மனைவியிடமும் விஸ்வநாதன் தகராறு செய்து கையால் தாக்கி கொலை மிரட்டல் விடுத்துள்ளார்.
இதுகுறித்து சுந்தர் இன்று (29.03.2023) அளித்த புகாரின் பேரில் வடபாகம் காவல் நிலைய உதவி ஆய்வாளர் திரு. மாணிக்கராஜ் வழக்கு பதிவு செய்து விஸ்வநாதனை கைது செய்தார். மேலும் இதுகுறித்து வடபாகம் காவல் நிலைய போலீசார் விசாரணை மேற்கொண்டு வருகின்றனர்.
