அஜிதா ஆக்னல் வேட்பாளர் சர்ச்சை: பரதர் சங்கம் கடும் மறுப்பு – அரசியல் சூடு!

2026 ஆம் ஆண்டு சட்டமன்றத் தேர்தலை முன்னிட்டு தூத்துக்குடி அரசியல் களம் சூடுபிடித்துள்ள நிலையில், தமிழக வெற்றிக் கழகத்தைச் சேர்ந்த அஜிதா ஆக்னல் தொடர்பான புதிய சர்ச்சை பரபரப்பை ஏற்படுத்தியுள்ளது.

தூத்துக்குடி மத்திய மாவட்ட பொறுப்பாளராக இருந்த அஜிதா ஆக்னல், கடந்த காலத்தில் கட்சிப் பதவி வழங்கப்படாத அதிருப்தி காரணமாக கட்சி தலைவர் விஜய்யின் காரை வழிமறித்து போராட்டத்தில் ஈடுபட்ட சம்பவம் அரசியல் வட்டாரத்தில் பேசுபொருளானது. மேலும், கடந்த டிசம்பர் மாதம் தூக்க மாத்திரை உட்கொண்டு தற்கொலை முயற்சி செய்த சம்பவமும் பரபரப்பை ஏற்படுத்தியது.

இந்நிலையில், 2026 தேர்தலில் தூத்துக்குடி தொகுதியில் போட்டியிட அஜிதா ஆக்னல் விருப்ப மனு அளித்துள்ளார். இதனிடையே, அவரை கட்சியின் அதிகாரப்பூர்வ வேட்பாளராக பரிசீலிக்க வேண்டும் என முத்துக்குளித்துறை பரதர் நலச் சங்கம் சார்பில் சென்னை பனையூர் அலுவலகத்திற்கு கடிதம் அனுப்பப்பட்டதாக தகவல் வெளியாகியது.

அந்த கடிதத்தில், அஜிதா ஆக்னல் சமூக நலப் பணிகள், உறுப்பினர் சேர்க்கை மற்றும் பொதுமக்கள் தொடர்பு நடவடிக்கைகளில் சிறப்பாக செயல்பட்டுள்ளார் என குறிப்பிடப்பட்டிருந்தது.

ஆனால், பரதர் நலச் சங்க நிர்வாகிகள் இந்தக் கடிதம் போலியானது என்று கடுமையாக மறுத்துள்ளனர். சங்கத் தலைவர் கனகராஜ் பர்னாந்து, பொதுச் செயலாளர் ராஜி பர்னாந்து, பொருளாளர் மிக்கேல் ஆகியோர் வெளியிட்ட வீடியோவில், “சங்கத்தின் லெட்டர் பேடு தவறாக பயன்படுத்தப்பட்டுள்ளது. எங்களால் எந்தவிதமான கடிதமும் அனுப்பப்படவில்லை. இது சட்ட விரோதமும் சங்கத்தின் கண்ணியத்தை பாதிக்கும் செயலாகும்” என்று தெரிவித்துள்ளனர்.

மேலும், 21.2.2026 அன்று நடைபெறவுள்ள பரதர் குல மாநாட்டை பாதிக்கும் நோக்கத்துடன் இந்த போலி கடிதம் தயாரிக்கப்பட்டிருக்கலாம் என்றும், சம்பந்தப்பட்டவர்களுக்கு எதிராக சட்ட நடவடிக்கை எடுக்கப்பட வேண்டும் என்றும் அவர்கள் வலியுறுத்தியுள்ளனர்.

இந்த விவகாரம் தற்போது தூத்துக்குடி அரசியல் வட்டாரத்தில் பெரும் பேசுபொருளாக மாறியுள்ளது. அஜிதா ஆக்னல் அதிகாரப்பூர்வ வேட்பாளராக அறிவிக்கப்படுவாரா? அல்லது இந்த சர்ச்சை தேர்தல் கணக்கில் புதிய மாற்றத்தை ஏற்படுத்துமா? என்பது அரசியல் ஆர்வலர்களின் கேள்வியாக உள்ளது.