அங்கன்வாடி மையங்களுக்கு கோடை விடுமுறை வழங்க கோரி ஊழியர்கள் தர்ணா போராட்டம்!

தூத்துக்குடி ஆட்சியர் அலுவலகத்தில் அங்கன்வாடி மையங்களுக்கு கோடை விடுமுறை வழங்க வேண்டும் உள்ளிட்ட பல்வேறு கோரிக்கைகளை வலியுறுத்தி தமிழ்நாடு அங்கன்வாடி மற்றும் உதவியாளர் சங்கம் சார்பில் மாலை நேர தர்ணா போராட்டத்தில் ஈடுபட்டனர்.

விடியோவை காண சும்மா தட்டி பாருங்க...

இதற்கு தமிழ்நாடு அங்கன்வாடி ஊழியர் மற்றும் உதவியாளர் சங்க மாவட்ட தலைவர் ஜெபராணி தலைமை வகித்தார். மாவட்ட துணைத் தலைவர் கலாவதி முன்னிலை வகித்தார். மாவட்ட செயலாளர் சந்திரா கோரிக்கை விளக்கவுரை ஆற்றினார். தமிழ்நாடு அனைத்துதுறை ஓய்வூதியர் சங்க மாவட்ட செயலாளர் இல.ராமமூர்த்தி போராட்டத்தை துவக்கி வைத்து பேசினார். சிஐடியு மாவட்ட தலைவர் ஆர்.பேச்சி முத்து, மாவட்ட துணைத் தலைவர் ரவி தாகூர்  ஆகியோர் வாழ்த்தி பேசினர். நிறைவாக தமிழ்நாடு அங்கன்வாடி ஊழியர் மற்றும் உதவியாளர் சங்க மாவட்ட பொருளாளர் ஜெயலட்சுமி நன்றியுரை ஆற்றினார்.

 அங்கன்வாடி பணியாளர்களுக்கு கால முறை ஊதியம் வழங்க வேண்டும், கோடை வெப்பம் காரணமாக பள்ளி, கல்லூரி விடுமுறை அளிப்பது போல் அங்கன்வாடி மையங்களுக்கு கோடை விடுமுறை அளிக்க வேண்டும், குறைந்த பட்ச ஓய்வூதியம் ₹.7850 வழங்க வேண்டும், ஓய்வு பெறும் அங்கன்வாடி பணியாளர்களுக்கு ஊக்க  தொகையாக 5 லட்சம், உதவியாளருக்கு 3 லட்சம் வழங்க வேண்டும்,  அரசு ஊழியர்களுக்கு வழங்குவது போல் அங்கன்வாடி ஊழியர்களுக்கும் மகப்பேறு விடுப்பு ஓராண்டு வழங்க வேண்டும், உள்ளிட்ட கோரிக்கைகளை வலியுறுத்தி போராட்டத்தில் ஈடுபட்டனர்.