ஞானேஷ் குமார் பதவி விலகக் கோரி டெல்லியில் போராட்டத்தில் ஈடுபட்ட இடது சாரி தலைவர்கள் கைது: தூத்துக்குடியில் இடதுசாரி கட்சிகள் சார்பில் கண்டன ஆர்ப்பாட்டம்!

தலைமைத் தேர்தல் ஆணையர் ஞானேஷ் குமார் பதவி விலக வலியுறுத்தி டெல்லியில் நடைபெற்ற போராட்டத்தின்போது மார்க்சிஸ்ட் கம்யூனிஸ்ட் கட்சித் தலைவர்கள் காவல்துறையினரால் கைது செய்யப்பட்டதைக் கண்டித்து, தூத்துக்குடியில் இடதுசாரி கட்சிகள் சார்பில் கண்டன ஆர்ப்பாட்டம் நடைபெற்றது.

வாக்காளர் பட்டியல் சிறப்பு தீவிர திருத்தப் பணிகள் (SIR) தொடர்பான பிரச்சினைகளுக்கு உரிய விளக்கம் அளிக்க வேண்டும், தேர்தல் நடைமுறைகளில் வெளிப்படைத்தன்மையை உறுதிப்படுத்த வேண்டும், ஜனநாயக உரிமைகளைப் பாதுகாக்க வேண்டும் என்பன உள்ளிட்ட கோரிக்கைகளை வலியுறுத்தி பல்வேறு அரசியல் கட்சிகள் போராட்டங்களில் ஈடுபட்டு வருகின்றன.

இந்நிலையில், தலைமைத் தேர்தல் ஆணையர் ஞானேஷ் குமார் பதவி விலக வலியுறுத்தி டெல்லியில் நடைபெற்ற போராட்டத்தில் மார்க்சிஸ்ட் கம்யூனிஸ்ட் கட்சியின் பொதுச் செயலாளர் எம்.ஏ. பேபி, முன்னாள் கேரள முதல்வர் பினராயி விஜயன், தமிழ்நாடு மாநிலச் செயலாளர் பெ.சண்முகம், அரசியல் தலைமைக் குழு உறுப்பினர் கே. பாலகிருஷ்ணன் , மத்தியக்குழு உறுப்பினர் உ.வாசுகி, நாடாளுமன்ற உறுப்பினர் ஜான் பிரிட்டாஸ் உள்ளிட்ட தலைவர்கள் காவல்துறையினரால் தடுத்து கைது செய்யப்பட்டுள்ளனர்.

இந்த நடவடிக்கையைக் கண்டித்து தூத்துக்குடியில் மார்க்சிஸ்ட் கம்யூனிஸ்ட் கட்சியின் மாநகரச் செயலாளர் முத்து தலைமையில் கண்டன ஆர்ப்பாட்டம் நடைபெற்றது. மார்க்சிஸ்ட் கம்யூனிஸ்ட் கட்சியின் மாவட்டச் செயலாளர் கே.பி. ஆறுமுகம், இந்திய கம்யூனிஸ்ட் கட்சியின் மாவட்டச் செயலாளர் கரும்பன், இந்திய கம்யூனிஸ்ட் கட்சி (மார்க்சிஸ்ட்–லெனினிஸ்ட்) மாநிலக் குழு உறுப்பினர் சகாயம், மார்க்சிஸ்ட் கம்யூனிஸ்ட் கட்சியின் மாநிலக் குழு உறுப்பினர் பூமயில் ஆகியோர் கலந்து கொண்டனர்.

மேலும், மாவட்டச் செயற்குழு உறுப்பினர் ராஜா, மாவட்டக் குழு உறுப்பினர்கள் காசி, இனிதா, ஒன்றியச் செயலாளர் சங்கரன், மாநகரக் குழு உறுப்பினர்கள் நாகராஜ், ஆறுமுகம், உறுப்பினர்கள் இல. இராமமூர்த்தி, மனோகரன், மாடசாமி உள்ளிட்ட இடதுசாரிக் கட்சி நிர்வாகிகள் பங்கேற்றனர்.

ஆர்ப்பாட்டத்தின்போது, டெல்லியில் போராட்டத்தில் ஈடுபட்ட தலைவர்களைத் தடுத்து கைது செய்யாததை கண்டித்து கோஷங்கள் எழுப்பப்பட்டன. கைது செய்யப்பட்ட தலைவர்களை விடுதலை செய்ய வேண்டும், ஜனநாயக ரீதியிலான போராட்ட உரிமையை மதிக்க வேண்டும், தேர்தல் நடைமுறைகளில் வெளிப்படைத்தன்மையை உறுதிப்படுத்த வேண்டும், வாக்காளர் பட்டியல் சிறப்பு தீவிர திருத்தம் தொடர்பான கேள்விகளுக்கு உரிய விளக்கம் அளிக்க வேண்டும், தலைமைத் தேர்தல் ஆணையர் ஞானேஷ் குமார் பதவி விலக வேண்டும் என்பன உள்ளிட்ட கோரிக்கைகள் வலியுறுத்தப்பட்டன.