ரயில்வே பணிக்காக வைத்திருந்த இரும்பு கம்பிகளை திருடிய 4பேர் கைது : சரக்கு வாகனம் பறிமுதல்!!

கடம்பூர் அருகே ரயில்வே பணிகளுக்காக வைத்திருந்த இரும்பு கம்பிகளை திருடிய 4பேரை போலீசார் கைது செய்தனர். திருடுவதற்கு பயன்படுத்தப்பட்ட சரக்கு வாகனம் பறிமுதல் செய்யப்பட்டது.

தூத்துக்குடி மாவட்டம் கடம்பூர் அருகே பரிவல்லிக்கோட்டை ரயில்வே கேட் அருகில் ரயில்வே சுரங்கபாதைக்கான கட்டுமான வேலை நடந்து வருகிறது. இந்நிலையில் அங்கு கட்டுமான வேலைக்காக பயன்படுத்தப்படும் இரும்பு கம்பிகள் கடந்த 10.06.2023 அன்று காணாமல் போயுள்ளது. இதுகுறித்து மேற்படி ரயில்வே சுரங்கப்பாதை கட்டுமான பணியில் ஈடுபட்டு வரும் தனியார் நிறுவனத்தின் தள மேற்பார்வையாளரான மதுரை கே.கே நகர் பகுதியை சேர்ந்த திருவேங்கடம் மகன் கோவிந்தராஜ் (48) என்பவர் கடம்பூர் காவல் நிலையத்தில் புகார் அளித்தார்.

அதன்பேரில் போலீசார் வழக்குபதிவு செய்து விசாரணை மேற்கொண்டதில், தூத்துக்குடி லேபர் காலனியைச் சேர்ந்த இருளாண்டி மகன் நவநீத கிருஷ்ணன் (30), மீளவிட்டான் கக்கன்ஜி நகரைச் சேர்ந்த தர்மர் மகன் லிங்கராஜ் (35), கடம்பூர் போலீஸ் காலனியைச் சேர்ந்த மாரிமுத்து மகன் மந்திரமூர்த்தி (23), ஓட்டப்பிடாரம், முப்பிலிவெட்டி கலைஞர் காலனியைச் சேர்ந்த ஞானராஜ் மகன் சுந்தரபாண்டி (22) மற்றும் சிலர் சேர்ந்து சம்பவ இடத்திலிருந்து இரும்பு கம்பிகளை சரக்கு வாகனத்தில் திருடி சென்றது தெரியவந்தது.

இதனையடுத்து கடம்பூர் காவல் நிலைய உதவி ஆய்வாளர் உலகநாதன் மற்றும் போலீசார் மேற்படி எதிரிகளான நவநீத கிருஷ்ணன், லிங்கராஜ், மந்திரமூர்த்தி மற்றும் சுந்தரபாண்டி ஆகிய 4 பேரையும் கைது செய்து அவர்களிடமிருந்த ரூபாய் 70,000/- மதிப்புள்ள 2000 கிலோ இரும்பு கம்பிகள் மற்றும் திருடுவதற்கு பயன்படுத்தப்பட்ட சரக்கு வாகனத்தையும் பறிமுதல் செய்தனர். மேலும் இதுகுறித்து கடம்பூர் காவல் நிலைய போலீசார் விசாரணை மேற்கொண்டு வருகின்றனர்.