வைகாசி விசாகம் எதிரொலி..! திருச்செந்தூரில் ₹100 சிறப்பு தரிசனம் 4 நாட்களுக்கு ரத்து..! லட்சக்கணக்கான பக்தர்களுக்கு கோயில் நிர்வாகம் முக்கிய அறிவிப்பு!

திருச்செந்தூர் சுப்பிரமணிய சுவாமி திருக்கோயிலில் நடைபெற்று வரும் வைகாசி விசாகப் பெருந்திருவிழாவை முன்னிட்டு, பக்தர்களின் வசதிக்காக முக்கிய அறிவிப்பை கோயில் நிர்வாகம் வெளியிட்டுள்ளது. அதன்படி, நாளை முதல் தொடர்ந்து 4 நாட்களுக்கு ₹100 சிறப்புக் கட்டணத் தரிசனம் முற்றிலும் ரத்து செய்யப்படுவதாக அறிவிக்கப்பட்டுள்ளது.

முருகப் பெருமானின் இரண்டாம் படை வீடாகப் போற்றப்படும் திருச்செந்தூர் சுப்பிரமணிய சுவாமி திருக்கோயிலில் வைகாசி விசாகத் திருவிழா கடந்த மே 24-ஆம் தேதி கொடியேற்றத்துடன் தொடங்கி சிறப்பாக நடைபெற்று வருகிறது. திருவிழாவின் முக்கிய நிகழ்வான வைகாசி விசாகப் பெருந்திருவிழா வரும் மே 30-ஆம் தேதி வெகு விமரிசையாக நடைபெற உள்ளது.

இதையொட்டி, தமிழகத்தின் பல்வேறு மாவட்டங்கள் மட்டுமின்றி அண்டை மாநிலங்களிலிருந்தும் லட்சக்கணக்கான பக்தர்கள் திருச்செந்தூருக்கு வருவார்கள் என எதிர்பார்க்கப்படுகிறது. குறிப்பாக பாதயாத்திரையாக வரும் பக்தர்கள் மற்றும் பொதுமக்கள் நீண்ட நேரம் வெயிலில் காத்திருப்பதைத் தவிர்க்கும் வகையில் கோயில் நிர்வாகம் இந்த முக்கிய முடிவை எடுத்துள்ளது.

அதன்படி, மே 28-ஆம் தேதி முதல் மே 31-ஆம் தேதி வரை நடைபெறும் நான்கு நாட்களிலும் ₹100 கட்டணத் தரிசனம் முற்றிலும் ரத்து செய்யப்படுகிறது. இந்த நாட்களில் கட்டணத் தரிசன வழிகள் அனைத்தும் பொதுத் தர்ம தரிசன பாதைகளாக மாற்றப்பட்டு, அனைத்து பக்தர்களும் எவ்விதக் கட்டணமுமின்றி ஒரே வரிசையில் சுவாமி தரிசனம் செய்ய ஏற்பாடு செய்யப்பட்டுள்ளதாக கோயில் நிர்வாகம் தெரிவித்துள்ளது.

மேலும், திருவிழா நாட்களில் ஏற்படும் கூட்ட நெரிசலை கட்டுப்படுத்தவும், பக்தர்கள் பாதுகாப்பாக தரிசனம் செய்யவும் பலத்த பாதுகாப்பு ஏற்பாடுகள் செய்யப்பட்டுள்ளன. தூத்துக்குடி மாவட்ட காவல்துறை சார்பில் நூற்றுக்கணக்கான போலீஸார் பாதுகாப்புப் பணியில் ஈடுபடுத்தப்பட உள்ளதாகவும் தெரிவிக்கப்பட்டுள்ளது.