தூத்துக்குடி தெப்பத் திருவிழா நடத்தாத திமுக – பாஜக தெருமுனைப் பிரச்சாரத்தில் கடும் கண்டனம்

தூத்துக்குடியில் பாரம்பரியமாக ஆண்டுதோறும் நடைபெறும், மிகவும் பிரசித்தி பெற்ற தெப்பத் திருவிழாவை இந்த ஆண்டு நடத்தாத திமுக அரசை கண்டித்து, பாரதிய ஜனதா கட்சி சார்பில் தெருமுனைப் பிரச்சாரம் நடைபெற்றது.

தூத்துக்குடி தெற்கு மாவட்ட பாஜக சார்பில், சிவன் கோவில் அருகே உள்ள தேரடி பகுதியில் இந்த பிரச்சாரம் நடைபெற்றது.

இந்த நிகழ்ச்சிக்கு பாஜக தெற்கு மாவட்ட துணைத் தலைவர் சண்முகசுந்தரம் தலைமை தாங்கினார்.

மாநில ஓபிசி அணி மாநில செயற்குழு உறுப்பினர் விவேகம் ரமேஷ் முன்னிலை வகித்தார்.

இதில் பாஜக நிர்வாகிகள் மற்றும் தொண்டர்கள் பலர் கலந்து கொண்டனர்.

நிகழ்ச்சியில் பேசிய சண்முகசுந்தரம், திமுக அரசு தேர்தல் காலத்தில் அளித்த வாக்குறுதிகளை நிறைவேற்றாமல், மக்களை ஏமாற்றும் வகையில் ஆட்சி நடத்தி வருவதாக குற்றம் சாட்டினார்.

பாஜக சாதனைகளை எடுத்துரைக்கும் சூழ்நிலையில், திமுக அரசின் தோல்விகள் குறித்தும் பேச வேண்டிய கட்டாயம் ஏற்பட்டுள்ளதாக அவர் தெரிவித்தார்.

மேலும், தூத்துக்குடியில் உள்ள தெப்பக்குளத்தில் நடைபெறும் தெப்பத் திருவிழா பக்தர்களின் முக்கிய வழிபாட்டு விழாவாக விளங்குகிறது என்றும், அந்த விழாவை இந்த ஆண்டு நடத்தாதது பொதுமக்கள் மற்றும் பக்தர்களின் மனதை புண்படுத்தும் செயல் என்றும் அவர் கூறினார்.

தெப்பக்குளம் சீரமைப்பு தொடர்பாக,

₹75 லட்சம் செலவில் பணிகள் மேற்கொள்ளப்படும் என்றும்,

“நமக்கு நாமே” திட்டத்தின் கீழ் ₹57 லட்சம் செலவிடப்படும் என்றும்,

பின்னர் ₹1 கோடியே 30 லட்சம் செலவில் பணிகள் நடைபெறும் என்றும் அறிவிக்கப்பட்டதாக அவர் சுட்டிக்காட்டினார்.

ஆனால், அறிவிக்கப்பட்ட பணிகள் முறையாக மேற்கொள்ளப்படாமல், தெப்பத் திருவிழா இந்த ஆண்டு நடத்தப்படவில்லை என்றும், பாஜக சார்பில் எதிர்ப்பு தெரிவிக்கப்பட்ட பின்னரே பணிகள் தொடங்கியதாக காட்டப்படுவது நாடகமாக இருப்பதாகவும் சண்முகசுந்தரம் குற்றம் சாட்டினார்.

இந்த விவகாரம், இறை வழிபாட்டை நம்பும் மக்களின் உணர்வுகளை பாதிக்கும் வகையில் உள்ளதாகவும், இதற்கு பாஜக கடும் கண்டனம் தெரிவிப்பதாகவும் அவர் தெரிவித்தார்.