ஓமன் துறைமுகத்தில் உயிரிழந்த தூத்துக்குடி கப்பல் மாலுமி நிஷாந்த்: உடலை முறையாக பராமரிக்கவில்லை என சக ஊழியர்கள் குற்றச்சாட்டு – நடவடிக்கை கோரி குடும்பத்தினர் மனு

தூத்துக்குடியைச் சேர்ந்த கப்பல் மாலுமி நிஷாந்த், ஓமன் நாட்டிற்கு சொந்தமான எண்ணெய் கப்பலில் பணியாற்றி வந்த நிலையில் மர்மமான முறையில் உயிரிழந்த சம்பவம் அவரது குடும்பத்தினர் மற்றும் உறவினர்கள் மத்தியில் பெரும் அதிர்ச்சியை ஏற்படுத்தியுள்ளது.

தகவலின்படி, சில நாட்களுக்கு முன்பு ஓமன் துறைமுகத்தில் கப்பல் நின்றிருந்தபோது உடல்நலக் குறைவு காரணமாக நிஷாந்த் உயிரிழந்ததாக கூறப்படுகிறது. அவர் அந்த கப்பலில் இரண்டாம் நிலை அலுவலராக (Second Officer) பணியாற்றி வந்தார்.

இந்த நிலையில், தனது கணவரின் மரணம் குறித்து முழுமையான விசாரணை நடத்த வேண்டும் என்றும், அவர் உயிரிழந்த சூழ்நிலை தொடர்பான உண்மை தகவல்களை வெளிக்கொணர வேண்டும் என்றும் நிஷாந்தின் மனைவி சரோபின் வலியுறுத்தியுள்ளார். மேலும், கப்பல் நிறுவனத்திடமிருந்து உரிய இழப்பீடு பெற்றுத் தர மத்திய மற்றும் மாநில அரசுகள் நடவடிக்கை எடுக்க வேண்டும் என தூத்துக்குடி மாவட்ட ஆட்சியரிடம் மனு அளித்துள்ளார்.

இதற்கிடையில், நிஷாந்துடன் பணியாற்றியதாக கூறப்படும் சக கப்பல் ஊழியர்கள் வெளியிட்ட வீடியோ ஒன்று சமூக வலைதளங்களில் பரபரப்பை ஏற்படுத்தியுள்ளது. அந்த வீடியோவில், உயிரிழந்த நிஷாந்தின் உடலை கப்பல் நிறுவனம் முறையான குளிர்சாதன வசதியில் பாதுகாக்காமல் மனிதாபிமானமற்ற முறையில் வைத்திருந்ததாக குற்றம்சாட்டப்பட்டுள்ளது.

மேலும், உடலை கப்பலின் ஒரு பகுதியில் வைத்திருந்ததுடன், உடல் சிதைவடையாமல் இருக்க குளிர்ந்த தண்ணீர் பாட்டில்கள் பயன்படுத்தப்பட்டதாகவும் அந்த ஊழியர்கள் தெரிவித்துள்ளனர்.

இதையடுத்து, இந்திய வெளியுறவுத்துறை அமைச்சகம் மற்றும் கப்பல் துறை அமைச்சகம் உடனடியாக தலையிட்டு, நிஷாந்தின் உடலை பாதுகாப்பாக மீட்டு அவரது சொந்த ஊரான தூத்துக்குடிக்கு கொண்டு வந்து குடும்பத்தினரிடம் ஒப்படைக்க வேண்டும் என சக ஊழியர்கள் கோரிக்கை விடுத்துள்ளனர்.

இந்த சம்பவம் தூத்துக்குடி மாவட்டத்தில் பெரும் சோகத்தை ஏற்படுத்தியுள்ளதுடன், வெளிநாட்டு கப்பல்களில் பணியாற்றும் இந்திய கப்பல் ஊழியர்களின் பாதுகாப்பு மற்றும் நலன் குறித்து பல்வேறு கேள்விகளையும் எழுப்பியுள்ளது.