ராகுல் காந்தி பிறந்தநாள்: தூத்துக்குடி முதியோர் இல்லத்தில் காலை உணவு வழங்கிய காங்கிரஸ் நிர்வாகிகள்

மக்களவை எதிர்க்கட்சித் தலைவரும், இந்திய தேசிய காங்கிரஸ் கட்சியின் முக்கிய தலைவருமான ராகுல் காந்தியின் பிறந்தநாளை முன்னிட்டு, தூத்துக்குடி மாவட்ட காங்கிரஸ் கட்சி சார்பில் முதியோர் இல்லத்தில் உள்ள முதியோர்களுக்கு காலை உணவு வழங்கும் நிகழ்ச்சி நடைபெற்றது.

தூத்துக்குடி சிதம்பரநகரில் அமைந்துள்ள ‘பாசக்கரங்கள்’ முதியோர் இல்லத்தில் நடைபெற்ற இந்நிகழ்ச்சிக்கு வடக்கு மாவட்ட காங்கிரஸ் கமிட்டி தலைவர் பெருமாள்சாமி தலைமை தாங்கினார். சமூக அக்கறையை வெளிப்படுத்தும் வகையில், முதியோர் இல்லத்தில் தங்கியுள்ள முதியோர்களுக்கு அன்புடன் காலை உணவு வழங்கப்பட்டது.

இந்த நிகழ்ச்சிக்கான முழு ஏற்பாடுகளையும் அகில இந்திய காங்கிரஸ் ஒர்க்கர்ஸ் கமிட்டி தலைவர் ஜெயக்கொடி மேற்கொண்டிருந்தார். நிகழ்ச்சியில் கலந்து கொண்ட காங்கிரஸ் நிர்வாகிகள் முதியோர்களுடன் உரையாடி, அவர்களது நலன் குறித்து கேட்டறிந்தனர்.

இந்நிகழ்வில் வடக்கு மாவட்ட துணைத் தலைவர் பெத்துராஜ், மாநகரச் செயலாளர் இக்னேசியஸ், மீனவரணி நிர்வாகி மிக்கேல் குரூஸ், பழங்குடியினர் பிரிவுத் தலைவர் முனியசாமி, மகிளா காங்கிரஸைச் சேர்ந்த தனலட்சுமி, இசக்கியம்மாள், ஜெஸ்ஸி உள்ளிட்டோர் பங்கேற்றனர்.

மேலும் கட்சி நிர்வாகிகளான செல்வமுருகன், முருகேசன், எஸ்.எம்.டி. சுந்தர்ராஜ், சாந்தகுமார், பாலகிருஷ்ணன், காமராஜ், மாரியப்பன், முத்துராஜ், தெர்மல் முத்து, ஷேக்ஸ்பியர் உள்ளிட்ட பலர் கலந்து கொண்டு நிகழ்ச்சியை சிறப்பித்தனர்.

ராகுல் காந்தியின் பிறந்தநாளை முன்னிட்டு நடைபெற்ற இந்த சமூகநல நிகழ்ச்சி, முதியோர்களிடையே மகிழ்ச்சியையும் நெகிழ்ச்சியையும் ஏற்படுத்தியது.